Reportajen Joselina dos Santos
Atu hadi’a kualifikadu rekursu umanu iha Timor-Leste, prepara rekursu sira hodi hasoru dezafiu dezenvolvimentu global no Timor-Leste, atu sai Membru Organizasaun Komersiu Mundial (OMK), tenke fornese edukasaun ho kualidade ba estudante sira, liuhosi kurríkulu relevante ne’ebé foka liu ba dezenvolvimentu abilidade no koñesimentu, ne’ebé presiza iha mundu servisu nian ba estudante sira hodi inkilina iha merkadu livre.
Liuhusi Semináriu Nasionál Sustentabilidade Ekonomia, Preparasaun Rekursu Umanu, Dezafiu no Oportunidade Timor-Leste Sai Membru Organizasaun Komérsiu Mundial (OMK), ne’ebé realiza husi Câmara de Comercio e Industria de Timor-Leste (CCI-TL) ne’e, Dosente UNTL Fakuldade Economia Gestão (FEG), Ananias Barreto hateten, nia ko’alia kona-ba Kontribuisaun no Rekursu Umanu Kualifikadu nune’e bele sai objetivu iha merkadu livre nian.
“Akademiku sira iha responsabilidade atu fornese edukasaun ho kualidade, liuhosi kuríkulu relevante ne’ebé foka liu ba dezenvolvimentu abilidade no koñesimentu ne’ebé presiza iha mundu servisu nian. Akademiku sira mós tenke fó formasaun ba estudante sira-nia hanoin kritíku, hodi rezolve problema no adaptabilidade ba mudansa”, dehan, Dosente UNTL Faculdade Economia Gestão (FEG), Ananias Barreto iha Salaun CNE Kolmera, 15/04.
Hafoin Seminariu, Estudante UNTL Fakuldade Ciência Exata (FCE), Remigia da Silva Goveia Leite, sente orgullu tebes bele partisipa iha seminariu nasionál ne’ebé ko’alia kona-ba oinsa Timor-Leste sai membru OMK nian ne’ebé inisia tebes joven sira hodi haree liu ba prosesu agrikultura nian. Timor-Leste presiza tebes atu dezenvolve agrikultura, joven maioria mak servisu iha liur tanba menus kampu traballu. Entaun seminariu ohin ne’e bele ajuda estudante sira hodi utiliza siénsia ne’ebé iha hodi promove agrikultura iha Timor-Leste.
“Seminariu ida ne’e motiva tebes ami katak tenke estuda no labele moe atu esforsu hodi servisu, importante tebes tanba bainhira ita koalia barak maibe la servisu entaun sei laiha folin. tanba ohin loron mundu modernu entaun halo ema barak sai baruk-ten no barak mak hakarak servisu iha rai liur doke iha rai rasik, maibe nafatin esforsu entaun ita presiza buka hatene no pratika hodi bele hadi’a diak liu iha futuru”, nia dehan.
