Home Notisia Liu 50% Komunidade Aldeia Fatuk Francisco La Asesu Bee Moos

Liu 50% Komunidade Aldeia Fatuk Francisco La Asesu Bee Moos

790
0
komunidade Eliza Pinto Cabral iha aldeia Fatuc Fransisco Becora. [Foto: Umbelina | 30.09.2021]

Reportajen Umbelina dos Reis

“Kleur ona bee la mai no ami tenke ba kuru iha àrea seluk hodi kuru, no dala barak ami tenke lori roupa foer ba família sira iha Hera, hodi fase no kuru husi ne’ebá mai Díli hodi atende ba nesesidade lor-loron”. Elisa Pinto.

Kada loron Ana Maria Guterres tenke lalin jerigen, hodi ba kuru bee iha mota ulun, tanba fatin ne’ebé nia hela to’o agora seidauk asesu ba bee mos.

Ana Maria tinan 59, hela besik bee matan fura foin tinan hirak liu ba, hodi fornese bee ba komunidade Aldeia Fatuk Francisco, Suku Kamea, Posto Administrativu Cristo Rei, Munisípiu Díli, maibé to’o agora bée tanke ne’e la fornese bee moos ba komunidade Aldeia ne’e.

“Ami dala ruma kuru bé iha viziñu sira nia uma, maibé dala ruma ami hirus malu, tanba hadau malu bee, ami barak iha aldeia ne’e la asesu bee moos, dala balun ami tenke ba kuru iha mota Ulun, suku Bekora” haktuir Ana Maria ba Neon Metin iha Aldeia Fatuk Francisco, Kuarta-feira (29/09)

Nia dehan antes fulan Abril tinan ne’e, asesu bee moos iha Aldeia Fatuk Francisco ladún problema, maibé hafoin udan bo’ot, mota sobu moos kanalizasaun bee moos hodi hasusar komunidade iha àrea ne’e atu hetan bee mos.

“Antes ne’e di’ak hela, hafoin fulan Abril mak, sai nune’e, ami susar los hetan bee moos no agora atu kuru bee ami tenke ba fatin seluk atu kuru, hodi uza ba tein, fase roupa no buat seluk ne’ebé mak ami presiza” tenik Ana Maria ne’ebé iha oan feto na’in tolu no mane na’in rua.

Tuir Ana Maria seidauk iha membru governu ka ONGs balun ne’ebé mak mai hare problema ne’e hodi tau atensaun hodi buka solusaun

Preokupasaun hanesan hato’o husi Elisa Pinto, tinan 25 ne’ebé hela iha àrea Terminal, Suku Kamea no dezde fulan Abril, komunidade iha àrea terminal mos la asesu bee moos ho di’ak.

“kleur ona bee la mai no ami tenke ba kuru iha àrea seluk hodi kuru, no dala barak ami tenke lori roupa foer ba família sira iha Hera, hodi fase no kuru husi ne’ebá mai Díli hodi atende ba nesesidade lor-loron” haktuir Elisa Pinto.

Dala ruma komunidade husi àrea Fatuk Francisco no Terminal hadau malu bee ne’ebé kada semana fornese husi Bee moos Empreza Públika ba komunidade suku Kamea.

“sira lori bee mai kada semana maibé ami tenke hadau malu, se mak lalais nia hetan barak hodi ajuda hemu no halo ba buat seluk” hateten Elisa Pinto.

Xefe Aldeia Judit de Jesus da Silva, [Foto: Umbelina | 30.09.2021]

Kona ba problema asesu ba bee moos iha Aldeia Fatuk Francisco, Xefe Aldeia Judit de Jesus da Silva rekoñese katak liu 50% komunidade iha àrea ne’e seidauk asesu ba bee moos, tanba balun hela iha rai lolon no balun tanba débito bee ki’ik.

Problema seluk mak, kanalizasaun ne’ebé hetan estragu durante udan bo’ot ne’ebé akontese iha loron 4 Abril.

“Kanalizasaun ne’ebé mak hetan estragu, komunidade balun mos la asesu ba bee moos no sira tenke arranja ho sira nia esforsu rasik, problema ne’e hau hanesan autoridade lokal, hau hato’o  ona ba governu maibé to’o agora seidauk hetan resposta ruma” afirma lideransa local ne’e.

Tuir dadus husi administrasaun Suku Kamea, Aldeia balun ne’ebé lokaliza iha àrea foho loron la asesu  bee moos.

“Aldeia hanesan Ailele hun, Ai-lo’ok Laran, Suku Laran, Kaisabe, Buburlau ne’e iha foho lolon no sira tenke la’o do’ok hodi kuru bé, tanba kanalizasaun bee moos la kobre iha sira nia hela fatin” relata António Afanito Vieira Costa, Membro Konsellu Suku Camea, Posto Administrativu Cristo Rei, Munisípiu Díli.

Maibé, aldeia balun ne’ebé mak iha rai tetuk, kuaze hetan hotu bee tanba hela besik sistema kanalizasaun bee moos ne’ebé mai husi àrea Benemauk Mota Ulun.

ntónio Afanito Vieira Costa, Membro Konsellu Suku Camea. [Foto: Umbelina | 30.09.2021]

Autoridade local suku Camea aprezenta ona problema la asesu bee moos iha àrea balun ne’ebé sei hasoru difikuldade ba bee moos, liu-liu komunidade ne’ebé mak hela iha àrea rai lolon.

“Ami halo ona proposta ba munisípiu Díli hodi hatama iha Planu Dezenvolvimentu Munisipál – PDM, atu bele halo kanalizasaun, maibé to’o agora seidauk iha resposta no ita kontinua hein, hodi loron ida bele resolve ita nia komunidade sira nia difikuldade” hakotu António Vieira.

Print Friendly, PDF & Email

LEAVE A REPLY

Please enter your comment!
Please enter your name here