Reportazen Benarda da Costa
Komandante Superintendente foun munisipiu Dili, Hendrique da Costa M.Si vizita Universidade Dili (UNDIL), ho objetivu atu hametin relasaun ne’ebe diak entre unversidade ho PNTL.
Iha vizita ne’e, Komandante Hendrique hateten hosi vizitasaun hanesan komandante foun ne’ebe mak foin assume kargo, hakarak entruduz an ba iha parte universidade sira, atu nune’e bele servisu hamutuk, liu-liu iha parte seguransa nian
“Ami identifika potensia iha Universidade UNDIL nian estudante hamutuk 8.000 ne’ebe numeru boot no hakarak atu haklaken informasaun ba iha estrutura UNDIL nian, atu nune’e bele kontinua hato’o mehi husi servisu hamutuk, hodi garante paz no estabilidade iha Dili”, dehan Komandante, iha UNDIL, 23/07.
Iha fatin hanesan Reitor UNDIL, Jose Agostinho da Costa Belo Perreira kontente ho vizita husi Komandante PNTL munisipiu Dili nian, tanba nudar vizitasaun pozitivu, polisia iha inisiativa atu hakbesik an ba iha universidade no estudante sira .
“Ami husi parte UNDIL nian la hare ba sira hanesan seguransa ne’ebe mak uza farda deit, maibe sira mos hanesan ema timoroan hodi assegura estabilidade no paz iha nasaun ida ne’e”, dehan Reitor UNDIL.
Iha vizitasaun ne’e mos koalia oinsa atu asegura Dili nia furak, estudante sira bele aprende ho diak, tanba ne’e maka ema hotu tenke lao tuir nafatin Lei ne’ebe mak iha no tenke iha inisiativa halo diak ba iha ita nia rai.
