Reportazen Francisco JDA
Edukasaun mak baze fundamental ba ema hotu hodi asesu, Edukasaun mak sai fator determinante hodi sukat ema nia abilidade, hodi partisipa iha prosesu dezenvolvimentu.
Iha artigu Konstituisaun RDTL artigu 59 konaba Edukasaun no Kultura ne’ebe hateten katak Estadu rekoñese no garante sidadaun hotu nia direitu ba edukasaun no kultura, nune’e mós harii sistema ensinu báziku universál, obrigatóriu no wainhira bele, saugati, tuir Lei haruka.
Iha Alinea rua hateten ema hotu iha direitu hanesan, ba oportunidade atu eskola no ba formasaun serbisu/profisaun nian.
Atu atinji ema ho kualidade importante mos tenke iha edukasaun ne’ebe kualidade, hodi bele hasai mos ema hosi mukit no kiak, maibe realidade hatudu maioria eskola publiku sira iha kapital no rural sedauk atinji edukasaun ne’ebe kualidade tanba infrastrutura, biblioteka no fasilidade sira seluk sedauk iha.
Situasaun Eskola Ensinu Baziku 1,2 Maubara hasoru kondisaun ne’ebe mak la adekuadu tanba sedauk iha biblioteka no sei menus manorin sira.
Neon Metin halo dadalia ho Vise Koordenador Eskola Ensino Baziku, 1,2 Maubra, Fernando dos Santos konaba kondisaun eskola refere, ne’ebe mak sei menus fasilidade no manorin.
“Koalia kona ba Biblioteka Organizasaun Internasionál Care mak atu Organiza, maibé tanba Covid-19 to’o agora seidauk realiza. Konaba manorin sira la sufisiente tanba balun tama ba iha reforma, balun tinan 70 to’o 80, sira tama ba laran hamriik de’it, pasiensia tanba manorin menus”, hateten Fernando ba Neon Metin iha Maubara, 22/07.
Nia hatutuan manorin sira ne’ebe refomra hamutuk nain 5 no to’o ohin loron governu sedauk reforma, no sira kontinua hanorin maske la tuir kurikulu, tanba tuir regras idade 60 sira tenke reforma ona
Konaba livru Fernando hateten to’o ohin loron eskola ne’e hasoru difikuldade tanba menus livru no kurikulu ne’ebe governu fon halo, hakerek testu naruk tebes no livru ba planu iha ida deit
Nia dehan planu de aula manorin sira mak halo rasik, maibé livru foun ne’e la iha. Manorin sira prepara mahar boot hodi hanorin, no livru foun ne’e sei presiza estuda barak antes hanorin estudante sira.
