Home Notisia SEII Lansa Inisiativa Spotlight Iha Bobonaro, Ermera no Viqueque

SEII Lansa Inisiativa Spotlight Iha Bobonaro, Ermera no Viqueque

387
0
lansamentu Inisiativa Spotlight. [Foto: Media SEII | 23.07.2020]

Reportazen Zevonia Vieira

Sekretária Estadu ba Igualdade no Inkluzaun (SEII), Maria José da Fonseca Monteiro de Jesus lansa Inisiativu Spotlight husi UE-ONU iha Salaun Administrasaun Munisípiu Bobonaro.

Liu hosi komunikadu imprensa ne’ebe Neon Metin hateten katak lansamentu inisiativa spotlight ne’ebe halao ona iha nivel nasional ba munisipiu, ho objetivu atu promove atividade rejional nian ne’ee antes ne’e difikulta ho pandemia Covid-19.

Progama Inisiativa Spotlight ne’ebe lansa iha Bobonaro mos atu hatudu katak estadu no parseiru sira iha esforsu makaas, hodi responde ba violensia hasoru feto no labarikf eti (VAWG-sila Ingles), hanesan prioridade esensial ida.

Sekretaria Estadu Maria Jose da Fonseca Monteira hateten atraves lansamentu ‘inisiativa spotlight’ ne’e, komunidade hotu-hotu sei tau hamutuk hanoin no esforsu atu garante katak, violénsia no diskriminasaun hasoru feto, labarik-feto ka mane no maluk ho defisiénsia sira, maluk sira ho orientasaun seksuál oioin iha ita-nia sosiedade nia laran sei lakon.

Nia hateten eventu munisipál hirak-ne’e sai hanesan oportunidade ida, atu hamosu inisiativa spotlight ne’e-rasik, atividade ne’ebé planeia ba iha munisípiu sira, nune’e mós parseiru xave, parte interesadu sira no apoiu sira ba iha komunidade.

Inisiativa ne’e Tuir Sekretaria Estadu katak  atu apoia sasukat sira governu nian, atu halakon forma hotu husi prátika perigu ba violénsia hasoru feto no labarik-feto sira. Investimentu tinan-tolu ba inisiativa spotlight iha Timor-Leste hamutuk 15 milaun dolares amerikanu.

Ninia objetivu mak atu hametin enkuadramentu legál nasaun no instituisaun sira, halo promosaun ba norma positivu sosiál nian, hasa’e asesu hodi apoia serbisu ba sobrevivente husi violénsia, hadi’ak kolesaun no utilizasaun dadus ba iha halo polítika ne’ebé di’ak liu no hametin parseria ho organizasaun sosiedade sivíl sira. Inisiativu ne’e lidera husi UN Women, PNUD, UNICEF, UNFPA no ILO.

Iha parte hanesan Koordenador Rezidente ONU iha Timor-Leste Roy Trivedy hateten iguladade jeneru hanesan prekondisaun ida, atu atinji Objetivu dezenvolvimentu sustentável. Inisiativa spotlight iha Timor-Leste signifika apoiu movimentu nasionál ida iha nível nasionál no munisipál ho promosaun abordajen multisetoriál ne’ebé parseiru hotu hamutuk atu fó liman ba malu atu halakon forma oioin husi violénsia hasoru feto no labarik-feto sira. Nasoins Unidas serbisu hamutuk ho ema no instituisaun barak, husi altu nível ba to’o povu kiik, inklui Governu, sosiedade sivíl, setór privadu, parseiru dezenvolvimentu, mane no labarik-mane sira, feto no labarik-feto sira atu halo mudansa loloos.

Liu hosi programa ne’e governu garante katak sei hetan impaktu iha nível nasionál, liuliu iha polítika, lejislasaun no apoiu ba iha instituisaun nasionál sira, atividade nível komunidade sira sei foka liu ba iha munisípiu tolu ne’ebé parseria ho sosiedade sivíl no organizasaun sira iha baze atu implementa programa ne’ebé fó prioritáriu liubá iha sobrevivente husi violénsia, feto foin-sa’e, feto no labarik-feto, ema ho defisiénsia, servisu na’in doméstika nian, komunidade LGBTI no feto sira ne’ebé kaben sedu (idade 18 mai kraik).

Embaixador Uniaun Europe aba Timor-Leste, Andrew Jacobs hateten Inisiativa Spotlight hanesan parseiru tinan naruk entre Uniaun Europeia no Nasoins Unidas, ho ninia investimentu globál hamutuk 500 millaun EURO ka 550 millaun dolares amerikanu, ho objetivu atu halakon forma oioin husi violénsia hasoru feto no labarik-feto iha tinan 2030. Programa ne’ebé boot ba iha feto no labarik-feto sira. Iha Timor-Leste inisiativa ida-ne’e sei foka liu ba iha eliminasaun violénsia doméstika no violénsia parseiru íntimu.

“Ba Uniaun Europeia no nasaun membru sira, halakon violénsia hasoru feto no labarik-feto ne’e prioridade ida ne’ebé labele iha negosiasaun. Ita hotu hatene katak ita sei la hala’o ida-ne’e mesamesak. Persiza iha esforsu ne’ebé iha koordenasaun di’ak husi autór sira hotu: Governu Timor-Leste, organizasaun internasionál, lider polítiku, organizasaun sosiedade sivíl, ativista sira iha baze, feto no labarik-feto no- importante liu mak- mane no labarik-mane sira. Uniaun Europeia ho kontenti apoiu esforsu Timor-Leste nian atu halakon violénsia ne’ebé perigu tebes ba feto no labarik-feto sira. Inisiativa spotlight sei hasa’e esforsu no hametin instituisaun sira atu asegura feto no labarik-feto laiha tan moris iha ta’uk nia laran,” tenik Andrew Jacobs, Embaixadór Uniaun Europeia ba Timor-Leste, iha loron 23/07.

Lansamentu ba munisípiu rua seluk sei hala’o iha munisípiu Ermera no Viqueque iha loron 6 fulan Agostu tinan 2020 no loron 13 fulan Agostu tinan 2020.

Sekretária Estadu ba Igualdade no Inkluzaun mak sei lidera eventu hirak-ne’e ho kolaborasaun hamutuk ho reprezentante sira husi munisípiu, ONU, Uniaun Europeia no parseiru sosiedade sivíl sira. Inisiativa spotlight ne’e iha nível nasionál lansa ona iha loron 5 fulan Marsu tinan 2020 iha Otél Timor-Dili.

Iha lansamentu ne’e marka prezensa delegasaun hosi Uniaun Europea Nasoens Unidas, Prezidente Autoridade Munisipiu Bobonaro no Organizasaun Sosiadade Sivil.

Inisiativa spotlight lansa iha fulan Setembru tinan 2017, hanesan parseiru globál ba plurianuál entre Uniaun Europeia no Nasoin Unidas atu halakon forma oioin husi violénsia hasoru feto no labarik-feto. Inisiativa ne’e hanesan esforsu globál ida ne’ebé seidauk akontese hodi investe iha igualdade jéneru no empoderamentu feto hanesan prekondisaun ida atu alkansa objetivu dezenvolvimentu sustentável. 

Iha pasifíku, partikularmente ita preukupa ho situasaun ne’e. Iha nasaun balun iha rejiaun ne’e, 75% feto hetan esperiénsia violénsia fízika ho seksuál iha sira-nia moris tomak. Dala barak situasaun ne’e afeta liu ba feto no labarik-feto marjinalizadu sira ne’ebé hasoru forma husi diskriminasaun oioin.  

Vizaun jerál husi inisiativa spotlight iha Timor-Leste mak feto no labarik-feto goja sira-nia direitu hodi moris livre husi violénsia iha nasaun Timor-Leste ne’ebé inkluzivu no igualdade jéneru. Programa ne’e aliña ho Timor-Leste nia “Planu Asaun Anuál kona-ba Violénsia bazeia ba Jéneru (2017-2021)” no meta nasionál objetivu dezenvolvimentu sustentável (ODS). Ida-ne’e sei kontribui ba iha eliminasaun violénsia doméstika/violénsia parseiru íntimu (DV/IPV sila Inglés) liuhusi atendimentu ba nesesidade feto no labarik-feto no rezolve kauza husi violénsia hasoru feto no labarik-feto, liuhosi aproximasaun multisetoriál no intersetoriál iha modelu ekolojia hotu.

Print Friendly, PDF & Email

LEAVE A REPLY

Please enter your comment!
Please enter your name here