Notísia hosi Indonesia correspondent Bill Birtles no Zevonia Vieira
Mane Austrália ne’ebé hetan akuzasaun krime abuzu seksuál barak hasoru labarik ho otas ki’ik sai objetu ba mandadu detensaun iha Timor-Leste, wainhira la marka prezensa iha tribunál iha fulan kotuk.
Ministériu Públiku iha kapitál Dili konfirma katak Robert Trott, ho idade 75, ne’ebé proprietáriu loja kebab no antes sai asesór polítika iha Dili, la partisipa iha audénsia hodi rona ninia akuzasaun iha fulan Dezembru liubá.
Trott hetan akuzasaun kona-ba ba krime abuzu seksuál hasoru labarik feto sira iha Dili akontese durante tinan balu nia laran.
Arguidu hateten katak nia nega ho loloos akuzasaun hasoru nia, ho hateten ba ABC “kazu hotu bazeia ba bosok lubuk ida.”
Nia dehan katak nia la marka prezensa iha tribunál iha fulan Dezembru tanba nia iha tumor, no nia koko oho a’an haree katak informasaun ne’ebé hasoru nia bosok mak hotu.
Adelina Meluk Lobu, husi JU.S Juridico Social, eskritóriu advogadu ne’ebé reprezenta alegada vitima sira, hateten ba ABC katak kazu ne’e inklui “akuzasaun ne’ebé sei inklui padraun grooming (koko oferese benefísiu oinoin) atu fasilita arguidu nia alegadu abuzu, no aproveita vítima nia vulnerabilidade ekonómika.”
Karik nia hetan kondenasaun ba krime ne’ebé nia akuzadu, Sr. Trott bele hetan kastigu másimu iha Timor-Leste ne’ebé mak tinan 30 iha prizaun.
Arguidu hetan detensaun iha fulan Juñu 2022, no iha detensaun durante loron tolu nia laran no polísia Timor-Leste mós halo divulgasaun hosi asaun kapturasaun refere liuhosi hatudu ba públiku detidu refere ho baclava, hafoin hetasai alvu ba investigasaun kona-ba krime abuzu seksuál hasoru labarik.
Investigasaun ne’e orijinalmente hahú iha Timor-Leste bazeia ba keixa ne’ebé haruka husi sidadaun Austrália ba Polísia Federal Austrália iha Austrália, hanesan deklara fonte husi investigasaun ne’e.
Juiz deside tempu ne’ebá Sr. Trott bele fila fali ba komunidade, no la iha akuzasaun ne’ebé hasai, maibé autoridade kaer metin ninia pasaporte hodi kontinua prosesu investigasaun.
Akuzasaun submeter ho formál tinan kotuk
Falta arguidu iha Tribunál fulan kotuk rezulta preokupasaun hosi Ministériu Públiku katak Sr. Trott, ne’ebé bele koalia Indonézia, bele buka dalan atu halai husi Timor-Leste, maibé nia konfirma ba ABC katak arguidu sei iha hela iha Dili.
Prokurador, Napolão Soares da Silva, dehan ba ABC katak nia la bele esplika ho detallu kona-ba kazu ne’e wainhira kazu sei iha tribunál nia oin.
Mandadu Kaptura
Trott hateten katak kazu ne’e “fraude boot ida” no motiva husi sentimentu rasimu kontra ema estranjeiru.
Nia dehan katak nia laiha advogadu no la hatene kona-ba hakat husi prokuradór ka polísia atu kaptura nia ka obriga nia atu ba iha tribunál, maske nia iha asesu ba Defensór Públiku.
Trott moris uluk iha Adelaide no mós hela iha Darwin, maibé hela tiha ona tinan 12 iha Timor-Leste, no konsidera rai ida-ne’e hanesan ninia knua.
Advogadu sira ba vitima alegada konfirma katak tribunál mak fó orden mandatu detensaun atu asegura nia sei marka prezensa iha audénsia tuir mai iha semana-ne’e.
Detensaun ba dahuluk hosi Sr. Trott akontese iha tinan 2022, no hetan atensaun boot husi média iha Timor-Leste, nasaun ki’ik ida ho prevalénsia boot violénsia bazeia ba jéneru.
Estudu Demográfiku saúde hosi governu halo iha tinan 2016 hatudu katak feto 40 liu-porsentu hetan ona violénsia fizika ka seksuál iha sira nia moris.
Copyright ABC News https://www.msn.com/en-au/news/australia/arrest-warrant-issued-for-australian-man-facing-child-sex-abuse-charges-after-he-fails-to-attend-court-in-timor-leste/ar-AA1n2p3h?fbclid=IwAR2uHb5WveG14DE6rQA2E4_47Gptr_QlVo_3hbcSvaHC91D7GFjv0JqVCJY
