Hosi Joseph Tulloch
Papa Leo XIV espresa ona nia “laran-triste tebes” kona-ba atake Israél nian foin daudaun ne’e hasoru parókia Katólika iha Gaza, no bolu atu “hapara imediatu barbaridade” iha fatin ne’e.
Hafoin Igreja Santa Família hetan atake iha Kinta-feira dader, ema Gaza na’in-tolu husi ema na’in-600 resin ne’ebé subar iha ne’ebá mate, no balun tan, inklui Padre Parókia Gabriel Romanelli, kanek.
Kona-ba ida ne’e, iha Domingu hafoin reza Angelus iha nia rezidénsia verau iha Castel Gandolfo, Papa temi vítima na’in-tolu nia naran – Saad Issa Kostandi Salameh, Foumia Issa Latif Ayyad, no Najwa Ibrahim Latif Abu Daoud – no dehan nia “besik” ba sira no sira-nia família.
Papa Leo hateten katak atake ne’e “ida de’it husi kontínuasaun atake militar Israél nian hasoru populasaun sivíl no fatin adorasaun nian iha Gaza”.
Papa apela atu “hapara imediatu barbaridade funu nian” no atu “rezolve konflitu ho dame”. Nia husu ba komunidade internasionál atu observa lei umanitária no respeitu obrigasaun atu proteje ema sivíl sira, “hanesan mós bandu kastigu koletivu, uza forsa la-ho diskriminasaun no obriga populasaun atu muda fatin”.
Papa Leo ramata nia apelasaun ho mensajen ida ba “ita-nia” komunidade kristã sira iha Médio Oriente, nia dehan komprende katak sira sente sira “bele halo buat uitoan de’it, iha situasaun trajiku ne’e”.
“Imi iha Papa no Igreja tomak nia fuan,” nia dehan. “Obrigadu ba imi-nia sasin fiar nian.”
Telefonema ho Netanyahu
Iha tempu loron antes, Papa hato’o ba jornalista sira bainhira nia fila husi Missa iha sidade Albano ne’ebé besik, Papa Leo hateten katak presiza “reza ba dame, no koko atu konvense parte hotu atu mai iha meza, atu halo diálogu no rai sira-nia kilat”.
“Mundu labele aguenta tan,” Papa dehan. “Konflitu barak tebes, funu barak tebes.”
Papa Leo hetan perguntas kona-ba nia telefonema iha Sesta-feira ho Benjamin Netanyahu, durante ne’ebé nia husu urjentemente “hafoun esforsu” atu hakotu konflitu, no lamenta ho “presu karun teb-tebes” ne’ebé povu sivíl Gaza nian selu.
“Ami insiste katak presiza proteje fatin sagradu hotu-hotu hosi relijiaun hotu-hotu nian,” Papa Leo dehan, “no respeitu ema no fatin sagradu sira no koko atu husik violénsia no ódio hotu-hotu.”
*Notisia original: https://www.vaticannews.va/en/pope/news/2025-07/pope-leo-gaza-church-barbarity-netanyahu.print.html
