Reportajen David da Costa
Ministru Interiór (MI) anúnsiu rekrutamentu foun ba kadetes Polísia Nasionál Timor-Leste (PNTL) sei hahú fila fali iha fulan Maio tinan ida ne’e, hafoin prosesu legal hotu remata. Ho total 400 vaga, governu mos prepara mudansa iha komisaun no juri, hodi asegura transparénsia no aprende husi problema iha rekrutamentu anteriór.
Ministru Interiór (MI), Francisco da Costa Guterres, hatete , rekrutamentu foun ba kadetes Polísia Nasionál Timor-Leste (PNTL) sei hahú fila fali iha fulan Maio tinan ida ne’e. Tanba prosesu sira ne’e hotu la’o tiha ona, hein diploma ministerial, hodi hahú prepara nia kritériu no prosesu teste nia, nune’e bele komesa ona rekrutamentu.
“Liu-liu diploma ministerial, baze legál ne’e mak importante liu para tenke la’o tuir no ami halo ida ne’e hotu ami haruka sira hahú fali ne’ebé ha’u hanoin se la’os iha fulan Abríl nia laran, entaun fulan Maio ita hahú ona halo rekrutamentu”, dehan Ministru Interiór Francisco da Costa Guterres ba jornalista sira iha Palásiu Governu, Kuarta 22/04.
Nia haktuir, kadetes foun PNTL ne’e sei nafatin ho totál 400, maibé kona-ba Komandu jerál ninia planu atu rekruta kadetes foun to’o 750 ne’e sei tau iha faze tuir mai.
“Sim ita nafatin ho 400, ida Komandu jerál dehan ne’e hein lai, ita avansa uluk ho 400 ne’e ita rezolve tiha lai mak sei loke tan,” nia afirma.
Nia esplika, ba teste ne’e sei mantein ho sira ne’ebé antes ne’e pasa ona iha selesaun dokumentu, no prosesu tuir mai ne’e prosesu eliminatoriu, nune’e mos ba prova kulturál ne’e sira sei servisu hamutuk ho Komisaun Funsaun Públiku (KFP), ne’ebé sira sei providensia ho sasán sira ne’ebé uza hodi halo teste. Tanba ne’e sei la aumenta orsamentu ba iha rekrutamentu foun ne’e.
Iha prosesu rekrutamentu ne’e, sei kria fila fali komisaun foun, no juri foun, maibé Komisaun Monitorizasaun no fiskalizasaun sei mantein balun tanba sira iha esperiénsia no sira mak konsege detekta falla barak entaun sei mantein sira balun hodi kontinua tau matan para prosesu ne’e bele la’o ho di’ak.
“Entaun ekipa juri ita troka totalmente, sekretáriadu mós ita troka totalmente, sekretáriadu ne’e ita sei tau ema husi mós Austrália no Portugál atu mai apoiu iha rekrutamentu,” nia subliña.
Nia salienta, iha rekrutamentu antes ne’e enfrenta problema, tanba fó fiar ba ema seluk iha prosesu, maibé solusaun ne’ebé di’ak mak uza matenek husi ema sira ne’e atu fó hanoin no aprende husi experiénsia.
“Ita tau ema tanba ita fó fiar ba malu, komisaun iha problema entaun ita uza lai ema ba, nune’e ho sira nia matenek ne’ebé sira iha bele fó tan hanoin ba ita para oinsá iha futuru ita bele uza rasik ita nia ema ona iha Prosesu rekrutamentu seluk mai tan” nia dehan.
Enkuantu sekretáriadu no ekipa juri sei entrega ba iha Komandu Polísia Nasionál Timor-Leste (PNTL) atu haree ba iha rekrutamentu foun ba kadetes sira.
