Reportajen Silvino Freitas
Oxfam iha Timor Leste ho Asosiasaun Jornalista Timor Lorosa’e (AJTL) realiza programa média tour hodi lori jornalista sira ba halo kobertura iha Rejiaun Administrativa Oecusse Ambeno (RAEOA) suku Bobometo Sub-rejiaun Oesilo, atu kobre informasaun sira liga krize klimátika ne’ebé dadaun ne’e mundu infrenta husi mudánsa klimátika nian iha kada epoka hodi halo komunidade sira infrenta bee menus afeta makaas ba feto labarik no ema ho difisénsia sira, no oinsá sira nia moris hodi sobrevive hasoru mudánsa klimátika ne’e rasik.
Prezidente AJTL Zevonia Vieira dehan, média tour ne’e ba dala ikus ona lori jornalista sira ba halo kobertura iha terenu nune’e oportunidade ne’e jornalista sira sei ba halo kobertura iha suku Bobometo RAEOA fronteira ho Kefa Indonesia nian, nune’e jornalista sira sei kobre asuntu mudánsa klimátika liga ho justisa klimátika hasoru feto labarik ema ho difisénsia sira ne’ebé vulnerable tebes hasoru krize global ne’ebé dadaun ne’e mundu infrenta.
“Jornalista sira identifika ona katak asesu ba bee moos tanba bailoron naruk no asaun ema nian ne’ebé la dun tau atensaun ba mudánsa klimátika, no mós seitor agrikultura ne’ebé hetan impaktu husi mudánsa klimátika liuliu iha area rural ne’ebé durante ne’e jornalista sira seida’uk to’o entaun AJTL foti oportunidade ida ne’e hodi lori jornalista sira ba Oecusse liuliu area fronteira sira hodi kobre feto sira nia moris ne’ebé lao dook sobrevive hasoru bailoron halo bee menus” informa Prezidente AJTL Zevonia Vieira, liuhusi konferénsia imprensa iha Oxfam Hudi-Laran Dili, (20/01).
Nia dehan tan, husi oportunidade ne’e jornalista sira sei kobre mós istória susesu sira ne’ebé grupu ka joven sira iha Bobometo RAEOA halo hodi konserva bee atu komunidade sira bele asesu bee besik sira, tanba asaun sira ne’e hanesan matenek lokál hodi bele auguenta hasoru krize mudánsa klimátika hodi hein tempu naruk governu nian ba asaun hasoru krize klimátika hodi lori bee moos ba besik komunidade.
“AJTL apresia ba Oxfam ne’ebé kontinua fó fiar ba AJTL hodi halo media tour ne’ebé fo benefísiu ba ema kbiit laek ka vulnerable sira atu fo sai sira nia lian, fo espasu barak liu ba ema kbiit laek no lian laek sira dalabarak ema haluha fo importánsia ba sira atu hato’o sira nia direitu liuliu ba justisa klimátika ne’ebé ita hakarak luta hamutuk no mós impaktu husi mudánsa klimátika liuliu ne’ebé halo sira sai vulnerable liu tan” dehan Prezidente AJTL Zevonia Vieira.
Fatin hanesan reprezentante Oxfam iha Timor Leste Adilson da Costa dehan, atividade média tour ne’ebé AJTL ho Oxfam halo ne’e foka liu ba asuntu mudansa klimátika liuliu ba maluk sira ne’ebé hetan impaktu makaas husi krize klimátika hanesan feto ema ho difisénsia, no oportunidade média tour ne’e Oxfam hakarak servisu ho jornalista sira hosi explora situasaun ida ne’e iha nivel komunidade.
“Hanesan ohin prezidente AJTL temi tiha ona katak programa média tour ne’e hala’o iha munisípiu 4 Baucau Lautem Ermera no ikus Oecusse iha suku Bobometo, jornalista sira halo kobertura ba asuntu impaktu husi mudánsa klimátika ba komunidade sira nia moris entaun Oxfam haree katak ne’e oportunidade di’ak” dehan Adilson ba jornalista iha Oxfam Hudi-Laran Dili.
Reprezentante Oxfam ne’e konklui katak, dalabarak média sira halo kobertura hodi kobre informasaun iha Dili de’it nune’e problema sosiál sira iha area rural la duun hetan atensaun ho di’ak, nune’e média tour iha Oecusse sei explora di’ak liu tan komunidade sira nia lian liuliu informasaun sira ne’ebé mosu ho impaktu husi krize klimátika ne’ebé komunidade sira infrenta iha Bobometo RAEOA, nune’e média tour iha Oecusse sei rona diretamente komunidade sira nia lian hasoru kona-ba impaktu husi krize klimátika ba atividade agrikultura no oinsá impaktu mudánsa klimátika ne’e rasik ba asesu ba bee no oinsá sira nia adaptasaun hodi sobrevive hasoru krize bee.
Média tour ne’ebé AJTL ho Oxfam halo ne’e sei lori jornalista nain 16 husi média dijitál no konvensionál hanesan RTTL, LABEH-TV, TVDJ, RADIU LIBERDADE, SAP-NEWS, INDEPENDENT, NEON-METIN, G-NEWS, LIAN-ORLULI, TVE LAFAEK-NEWS no seluk tan, nune’e média tour ne’e ba dala ikus ba tinan 2024 antes ne’e média tour hala’o uluk ona iha munisípiu Lautem, Ermera no Baucau.
