Reportajen David da Costa Gusmao
“Uluk hau lakohi vasina, tanba haree informasaun sira ne’ebé espalla iha media sosiál, katak ema vasina bele mate, ho ida ne’e mak hau lakoi vasina maibé ohin Vise Ministru Saude esplika ona katak vasina sei la hamate ita entaun hau prontu ona atu vasina, hodi prevene-an husi surtu Covid-19 ne’e”. Rosario
Vise Ministru Saude (V-MS) ,Bonifácio Maucoli husu komunidade sira iha suku neen, iha postu Administrativu Railaku munisipiu Ermera atu vasina hotu, labele fiar hoax ka informasaun falsu ne’ebe espalla iha sosial media, maibe fiar ba iha enfermeiru no Doutór sira.
“Labele fiar hoax ne’ebe mak lansa iha media sosiál, tanba laiha nasaun ida mak atu oho nia povu, liu-liu nasaun Timor-Leste, bainhira ita hakarak luta atu hetan soberania ida , ita rasik kaer ita nia soberania, hakarak luta hasoru buat hotu, kiak ka mukit no moras, atu kombate virus ida ne’e ita presiza ema ne’ebe estuda ba saude, para atu haree situasaun sira hanesan ne’e,” dehan Vise Ministru Saúde, bainhira halo’o advokasia ba komunidade konaba vasinasaun iha suku Railaku, postu Railaku, Munisipiu Ermera, Kuarta 04/08.
Nia haktuir governu sei la hanoin hodi oho nia povu, efeitu sekundária iha uituan, maibé vasina ida ne’e la’os halo iha Dili, vasina ne’e halo iha nasaun sira ne’ebé mak iha esperiénsia barak ona, mak halo vasina. Sira prodúz vasina ne’e, ho estudu katak atu hasae imunidade ema nian, atu hasoru Covid-19 liu-liu mak variante ne’ebe mak mosu ona iha Indonesia.
Governate ne’e husu ba Ermera oan sira mai simu vasina, labele fiar mak lia falsu sira ne’ebé mak sirkula katak ema vasina hotu tinan rua bele mate, ne’e bosok, “ami sira simu ona vasina ona maibé la mate, tanba bainhira fó vasina ita nia médiku sira sei halo konsulta ba ita nia tensaun, no haree ita nia fíziku saude sira ne’e”.
Iha fatin hanesan Komunidade Rosário Ximenes hateten prontu ona atu simu vasina, tanba Ministériu Saúde esplika klaru ona katak vasina ne’e la hamate ema.
“Uluk hau lakohi vasina, tanba haree informasaun sira ne’ebé espalla iha media sosiál, katak ema vasina bele mate, ho ida ne’e mak hau lakoi vasina maibé ohin Vise Ministru Saude esplika ona katak vasina sei la hamate ita entaun hau prontu ona atu vasina, hodi prevene-an husi surtu Covid-19 ne’e”, dehan nia.
Entertantu dadus ba kazu COVID – 19 ba loron 04 Agostu, Ministériu Saúde deteta kazu foun iha Ermera nain ida , kazu ativu iha Ermera total 589 , rekuperadu hamutuk 147 no kazu konfirmadu iha Ermera hamutuk 736.
Taxa ema ne’ebe simu vasina iha Ermera foin mak atinje 12% ka ema hamutuk 9000 deit mak foin simu vasina
