Reportajen Cresensia de Castro
Planu alargamentu ne’ebe sei implementa husi governu liu husi Secretário de Estado dos Assuntos Toponímia e Organização Urbana (SEATOU), iha area estrada Kuluhun to’o Fatu-Ahi, hamosu preokupasaun husi vendedór sira iha are ne’e, tanba fatin ne’eba mak sai fatin ba sira hodi hatutan moris, iha tempu naruk nia laran.
Neon Metin halo vox pop, hodi husu sira nia sentimentu ba situasaun ne’e, ba Neon Metin Manuel Costansio nu’udar vendedor iha terminal Becora, nia hela iha ne’eba dezde tinan 1980 to’o ohin loron, nia dehan iha tempu naruk faan sasan hodi buka sustenta moris uma laran nian, selu oan sira nia eskola to’o iha nivel universidade
“Kada loron hau faan iha ne’e, depende ba ema kuandu rame entaun hau hetan $100. Osan Sira ne mak uza hodi sustenta nesesidade uma laran nian, oan sira no selu oan sira nia eskola” hateten Nia
Nia hatutan estadu aviza ona katak iha tempu badak nia laran, tenke halo mamuk ona fatin ne’e, maibe atu halo mamuk oinsá, nia seidauk hatene mais ou menus fo netik sementu ka kalén ruma, atu bele ba halo netik uma oan ida, hodi hela no kontinua moris.
“Ami hela iha ne’e laos kategoria hanesan ho iha fomentu ne’eba, ami hela iha ne’e husi kedas 1980, ne’ebe atu sai hanusa, tanba ami laos animal, duni sai ami atu ba hela fali iha duut laran ka iha ai okos” dehan Nia.
Nia esplika sira bele koopera ho di’ak maibe estadu mos tenke tau matan netik ba sira, ho ajuda ruma atu nune, sira bele kontinua buka moris.
Iha fatin hanesan estudante Universitáriu Jaquelina dos Reis hahu faan bua, malus no modo tahan iha terminal Bekora iha tinan 2019, bainhira nia hahu estudu iha Universidade Catolica Timorense UCT to’o agora.
Nia hateten fa’an sasan iha ne’e laos atu selu eskola, tamba maun sira mak selu, maibe atu ajuda maun Sira hodi selu rasik osan bemo ba mai eskola nian, no buka osan foto kopia materia nian.
“Ami faan iha ne’e atu sustenta ami nia nesesidade ki’ikoan sira hanesan sosa sabaun, selu bemo no halo fotokopia ba materia eskola nian, maibe ami rona ona informasaun katak fatin ne tenke hamamuk ona, parese ami sei fan tama liu ba laran, maske ema ladun hola barak maibe ami sei kontinua faan” esplika Nia
Nia mos husu ba parte governu karik bele ajuda netik sira, hanesan kria espasu merkadu ka orsamentu ruma atu sira bele kontinua faan.
Iha sorin seluk Felizarda de Sousa, inan husi oan nain 12 ho idade 64, husi munisipiu Viqueque hahu faan sasan iha merkadu Maufelu iha tinan 2019, no konsenge hare oan sira, balun gradua ona.
Nia dehan hahu fan iha estrada ninin merkadu Maufelu ho sasan kios nian, akompana ho nasi bungkus to’o agora.
“Ami faan sasan iha ne’e mada loron depende Ema rame ami bele hetan osan to’o $100 hanesan ne’e maibe kuandu la rame ami sei hetan netik 50 mai kraik hanesan ne’e no ami hola sasan mos karun” .dehan nia
Nia husu governu prepara fatin ba sira atu hela provisoriu ka lae? Sekarik sira tenke hamamuk fatin ne’e, tanba tuir nia observasaun komunidade balun halerik, balun tur iha ponte okos, maibe governu la tau matan
“Ema halerik deit mos governu la sibuk ona satan sira, ho nune sira prontu no halo tuir deit tamba se la halo tuir mak governu sei mai ho forsa, no sira forsa la iha”, tenik nia.
Parte governu mos antes fo hatene ona sira atu lori kartaun eleitoral ba ona, maibe atu hetan ajuda ruma husi governu ka lae sira seidauk hatene.
“Ami fatin la iha atu kontinua faan, uluk sira dehan fatin iha maibe too agra sira seidauk hatudu fatin mai ami pasensia sasan sira ne’e ami rai deit iha uma hodi uja ba han hemu tamba ida ne’e mak ami nia moris karik la iha ona pasensia ami simu deit” hakotu nia
Ikus Liu tuir informasaun ne’ebe komunidade Sira hetan katak tenki hamamuk Fatin refere husi diak 10 Janeiro to’o 10 Fevereiru.
