Reportajen Zevonia Vieira
Ekipa susesu husi kandidatu Prezidente Republika, Dr. Francisco Guterres Lu Olo, ho númeru sorteiu 6 no Virgilio da Silva Guterres Lu Olo ho númeru sorteiu 12, halo konferénsia imprensa relasiona ona ho debate públiku ne’ebe host husi GMNTV no modera husi Espidito Dias Ximenes.
Porta voz ekipa susesu Lu Olo, Fernando Gusmao hateten ba jornalista katak kontinua preokupa ho kestaun imparsialidade ne’ebe mosu naturalmente, tanba Komisaun Nasional Eleisaun (CNE) hili primeiravez GMN TV, empreza privada ida, nu’udar estasaun televizaun ba organiza debate ba asuntu ida ne’ebe iha interese publiku.
Fernando dehan to’o agora ekipa susesu seidauk hetan esplikasaun klaru husi CNE, no sira nafatin dehan razaun kustu tanba GMN TV baratu liu, maibe esplikasaun konaba kustu mos sedauk klaru, tanba hatetej deit kustu ne’e 12 mill deit.
Tuir Fernando ekipa susesu husi númeru 6 ho 12 hakarak foka liu ba aspetu seluk ne’ebe importante liu duke kustu, ne’e mak direitu povu nian atu hetan informasaun hotu, liu-li programa kompromisu polítiku hotu husi kandidatu sira iha eleisaun prezidensial nian.
Ekipa kandidatu nain rua nian hare katak devér públiku nian atu hatutan informasaun ne’ebe imparsiál no kredivel ba povu tomak.
“Enkuantu CNE hatudu GMN TV hanesan uma nain ba debate ne’e maibe iha lalaok ne’ebe hatudu to’o ohin loron GMN TV sedauk hatudu sira nia imparsialidade iha sira nia kobertura no notísia sira hotu. Esperiénsia ne’ebe durante ne’e ita akompanha ba kotuk, RTTL mak sempre sai uma nain ba debate sira ne’e, nune’e agora CNE fo fali GMN ne’ebe laiha esperiénsia atu halao debate ida ne’e ami hare katak CNE halimar hela ho programa ne’ebe importante tebes iha kampaña Prezidensial nian, iha ne’e ita koalia konaba debate entre kandidatu sira”, dehan Fernando, 15/03, iha Kooperativa Café Bidau.
Nia hatutan povu hotu iha direitu asesu ba informasaun, maibe tranzmisaun ne’ebe GMN TV iha, labele kobre ba territóriu tomak, nune’e povu sira ne’ebe hela iha area rural labele asesu ba debate ne’ebe mak sei hala’o.
“Tuir loloos antes atu hakotu media ida ne’ebe mak atu sai uma nain ba debate, CNE tenke konvoka reuniaun ho kandidatu sira ou reprezante kandidatu nian, hodi deskuti mak foin hili media ne’ebe bele fo fiar atu sai uma nain ba debate, maibe ida ne’e CNE la halo”, dehan Fernando
Maske CNE sedauk responde ekipa kandidatu nain 2 nia protesta maibe liuhusi konferénsia ne’e ekipa susesu nain rua ne’e afirma katak kandidatu Prezidente Republika Lu Olo ho Virgilio da Silva Guterres sei tuir debate CNE nian, maibe sei la retira liafuan sira ne’ebe koalia uluk ona katak, kontinua hare katak GMN TV sedauk hatudu sira nia imparsialidade to’o ohin loron.
“Partisipasaun ba iha debate husi Lu Olo ho Lamukan tan deit hakarak fo sai sira nia kompromisu polítiku, no mos hakarak halao debate ho kandidatu sira seluk”, dehan Fernando
