Home Notisia Kandidatu PR Isabel: Joven Tenke Kriativu Hodi La Monu Ba Manipulasaun Polítika

Kandidatu PR Isabel: Joven Tenke Kriativu Hodi La Monu Ba Manipulasaun Polítika

628
0
Kandidatu PR Numeru 1, Isabel ho nia apoiante sira. [Foto: Adroaldo | 13.03.2022]

Reportajen Adroaldo ‘Saretukau’

Kandidatu independente ba Prezidente Repúblika, Isabel da Costa Ferreira hala’o nia mini kampaña no diálogu hamutuk ho komunidade no juventude sira iha postu administrativu Railaku, Gleno iha Uma ba Dame, munisípiu Ermera hodi ko’alia ho joven sira atu prepara aan sai joven kreativu no tenki sai foinsa’e ne’ebé iha espíritu patriotizmu nune’e labele monu ho fasil ba manipulasaun polítika sira.

Kandidatu ne’e espera iha eleisaun ida ne’e povu Timor tomak matan nakloke neon na’in para foti desizaun ida loos, di’ak ba nia família, komunidade no ba nasaun.

“Ita ukun aan iha sékulu 21, liu-liu ba joven sira labele sai pasivu atu ema uza de’it, labale! Imi tenke sai joven ne’ebé kreativu, hatene verifika para labele monu ba manipulasaun polítika no ema riku nian. Tempu to’o ona Timor atu sai husi situasaun ida ne’e. Ha’u mos mai ho vizaun ida, se oan ida matenek, muda nia moris, muda nia família, muda nia komunidade no muda nasaun. Tan ne’e mak agora dadauk hau implementa hela programa ida ho naran Conta da Bebé hodi prepara ba ki’ik oan sira nia futuru. Programa ne’e rasik implementa ona iha munisípiu lima,” dehan kandidatu Isabel iha Postu Railaku, Sábadu, 12/03.

Entretantu iha intervensaun ba juventude sira iha Gleno, Uma ba Dame, kandidatu ho númeru sorteiu 1, husu foin sa’e sira tenke iha espíritu patriotizmu hodi labele monu ba manobra oi-oin.

“Atu liberta ita nia aan husi kiak no mukit, ita tenke uza espíritu luta ba libertasaun nasional. Ha’u la mai lori osan atu tula povu husi fati-fatin mai hasoru ha’u, maibé ha’u mai direita atu ko’alia ho imi. Foinsa’e sira tenke iha espíritu patriotizmu atu nune’e osan no poder labele tiru borus imi. Joven ne’ebé la iha prinsípiu, futuru nasaun nian mos namlele. Tanba nia hanoin ba nia aan de’it, la hanoin futuru nasaun nian,” hatete Isabel liu hosi nia Pájina Ofisial Facebook, 12/03.

Print Friendly, PDF & Email

LEAVE A REPLY

Please enter your comment!
Please enter your name here