Reportazen Adalgisa Pereira
Ministeriu ba Asuntus Parlamentar no Komunikasaun Sosial (MAPKOMS) ho Sekretariu Estadu Komunikasaun Sosial (SECOMS) halo dialogu ho komunidade suku Ossú Decima, iha aldeia Kaiwai hodi koalia konaba importansia hari torre transmisaun, hodi tulun komunidade Viqueque asessu informasaun kona-ba prosesu dezenvolvimentu sira liu husi plataforma digital nian.
Iha dialogu ne’e Ministru Asuntu Parlamentar no Komunkasaun Sosial Francisco Jeronimo hateten komunidade ne’ebe mak asesu informasaun foin mak 48% no 52% seidauk asesu ba informasaun .
“Diversifika komunikasaun sosial ita koalia kona-ba komunikasaun sosial, infraestrutura ne’ebe adekuadu atu fasilita, atu nune’e transmisaun sira ne’e bele iha radiu no televisaun, atu nune’e sira bele asesu, la’os iha urbana maibe mos iha nivel rural”, hateten Ministru Fransisco Jeronimo, 24/11.
Iha fatin hanesan Xefe Suku Ossu Decima, Celestino Monteiro de Carvalho hateten harii torre iha mundu perdidu no kualker aktividade dezenvolvimentu apoiu, maibe autoridade lokal ne’e mos husu oinsa mak resolve fatin istoriku, plantasaun ,ambiental ,florestal no husu mos ba SECOMS kona-ba suku balun hetan ona naroman ba suku, maibe suku balun seidauk hetan fatin no Kontak Dame Larigutu agora dadaun ne’e abandona.
Iha dialogu ne’e mos autoridade lokal hosi suku haat, mos konkorda hodi harii torre transmisaun maske iha desintendementu balun maibe sei iha posibilidade ba komunidade ho autoridade lokal sira, tuur hamutuk resolve hodi hetan solusaun.
Iha dialogu ne’e partisipa husi administrador Ossú Komadante PNTL Viqueque ,PNTL Eskuadra Ossú vetereranus, autoridade lokal no komunidade husi suku Ossú decimal, Loi hunu, Builale ho Learuka.
