Home Notisia Loron 16 Kampanya Ativismu Kontra VBJ, Fokupers Simu Kazu Violensia 263

Loron 16 Kampanya Ativismu Kontra VBJ, Fokupers Simu Kazu Violensia 263

221
0
Loron 12 Kampanya ativistu Kontra VBJ. [Foto: Santina Lucia da Costa | 25.11.2020]

Reportazen Santina Lucia da Costa

Dadus ne’ebe simu hahu iha fulan Janeiru to’o Outubru  2020, simu kazu hamutuk 263, kazu violensia domestika ba ema boot hamutuk 97, violensia fiziku ba labarik feto iha 4, abandona husi Laen hamutuk 65, abandona husi Namorada 15, abuzu seksual ba labarik 10, violensia seksual ba labarik 12, kazu insestu ba labarik hamutuk 18.

Rede Feto Timor-Leste organiza atividade loron 16  Ativismu Kontra Violensia Bazeia ba Jeneru (VBJ), ne’ebe hahu iha 25 Novembru 2020 liu hosi Long March ho tema  “Hapara Violensia, Respeita Direitu Humanu, Respeita Ema nia Liberdade.”

Liu hosi loron 16 Ativismu Kontra Violensia Bazeia ba Jeneru ho objetivu halo kampanya hodi bolu atensaun ba publiku, hodi hamrik defende direitu feto vulneravel, ema ho difisiensia tanba sira ne’e mak sempre sai nudar tarjetu ba violensia. Ema hotu simu responsabilidade hodi proteje sira nia hela fatin no asegura atu la akontese violensia kontra feto no labarik feto iha sira nia hela fatin.

Liu hosi kampanya refere, hanesan oportunidade atu bolu publiku, hodi hamutuk respeita direitu liberdade ema ida-idak nian, promove dame, paz no harmonia iha sosiedade.

Ba jornalista sira Prezidente Konsellu Rede Feto Timot-Leste hateten violensia kontra feto no mos labarik feto, iha inisiu kedas Rede Feto firmi ho nia pozisaun, oinsa atu luta kontra violensia hasoru feto no labarik feto, serbisu sira ne’ebe mak durante halo iha parte rua mak halo prevensaun no fo asistensia ba feto maluk sira ne’ebe sai vitima.

“Konsentra iha area ida ne’ebe mak ami hanoin katak area importante tebes, ita hamutuk ho maluk sira iha area ida ne’e, ita hotu-hotu hatene tinan ida ne’e akontese violensia kontra feto labarik feto liuhusi kazu tolu iha area suku Comoro”, hateten Prezidente Konsellu Rede Feto TL, Yasinta Lujinha iha Tasi-Tolu, loron, 25/11.

Prezidente Konsellu Rede Feto dehan akontese violensia kontra feto no labarik feto ne’e tristeza, maibe ita presija mobiliza ita nia forsa hamutuk, tanba ne’e laos fo de’it serbisu ba autoridade hodi haree kazu ne’ebe akontese, komunidade, sosiedade sivil no mos estadu presija serbisu hamutuk, hodi kombate kontra violensia hasoru feto no labarik feto.

Yasinta Lujinha reforsatan solusaun ba problema violensia kontra feto no labarik feto ne’e iha ita hotu-hotu nia liman, “ita ema mak nia solusaun, ita tenki serbisu hamutuk parte sosiedade, sosiedade sivil no mos estadu, parte tolu ne’e wainhira kolabora hamutuk hodi kontra violensia fiar katak, ita bele elemina violensia domestika kontra feto no labarik feto”.

Iha fatin hanesan Xefe Adjuntu Postu Administrativu Dom Aleixo, Lino Pereira da Cruz akresenta violensia kontra feto no labarik feto, ho tempu ida hanesan ne’e ita presija serbisu hamutuk husi NGO Internasional, Organizasaun Rede Feto, serbisu hamutuk ho Autoridade lokal sira ka ho igreja hamutuk hodi bele prevene violensia ne’ebe akontese iha Bairu ka Suku.

“Fo hanoin ba joven sira liuliu ba ami mane ne’ebe mak dalaruma koalia iha uma laran hasoru violensia fiziku hasoru feto sira. Maibe husu ba ita boot sira katak, buat ruma dehan ami mane mak sala hela de’it, maibe iha parte ida mos ita tenki haree  ninia sala ne’e iha ne’ebe no los ne’e iha ne’ebe”, hateten Xefe Adjuntu Postu Administrativu Dom Aleixo.

Nune’e mos Diretora FOKUPERS, Maria Jose Guterres informa FOKUPERS hanesan mos membru husi Rede Feto Timor-Leste, iha dadus ne’ebe simu hahu iha fulan Janeiru to’o Outubru  2020, simu kazu hamutuk 263, kazu violensia domestika ba ema boot hamutuk 97, violensia fiziku ba labarik feto iha 4, abandona husi Laen hamutuk 65, abandona husi Namorada 15, abuzu seksual ba labarik 10, violensia seksual ba labarik 12, kazu insestu ba labarik hamutuk 18, violensia publik ba labarik hamutuk 5, violensia publik ba ema boot 10, ameasa atu oho aan iha 4,  trafiku umanu ba ema boot iha 1, no mos hadau malu oan iha 2, no mos ba infantesidu inan abandona bebe iha 2, ameasa ka deslamasaun 2, estragus sasan iha 1.

Maria Jose Guterres hatutan total kazu ne’ebe mak disidi iha Tribunal, husi kazu hira ne’e mak iha 10, maioria sei prosesu iha Ministeriu Publiku no sira ne’ebe rekupera iha sira nia situasaun hamutuk 71, ne’ebe mak durante ne’e hela iha uma mahon. Iha uma mahon Dili hamutuk 81, Uma Mahon Maria Tapo iha 71, no mos iha uma tranzitoriu Suai iha 76.

Loron 16 aitivismu ne’ebe hahu iha loron  25 Novembru, sei kontinua ho atividade diferentes durante loron 16 no sei termina iha loron 10 Dezembru 2020.

LEAVE A REPLY

Please enter your comment!
Please enter your name here