Reportajen Francisco JDA
Ohin Presidente Parlamentu Nasionál (PPN), Aniceto Guterres fo posse ba membru Komisáriu Nasionál Eleitorál (CNE) no Presidente CNE, José Agostino Belo ba mandatu tinan 5.
Iha diskursu PPN, Aniceto Guterres hateten katak ezisténsia no konsisténsia órgaun eleitorál sira tenke bazeia ba prinsípiu profisionalizmu, lealdade, integridade, imparsialidade ho objetividade hodi garante no asegura nafatin kualidade Demokrasia no kualidade eleisaun
“Iha demokrasia reprezentativa eleisaun nu’udar momentu oportunidade ba sidadaun sira, atu hatudu sira nia espetativa, sira nia opsaun polítika no depozita sira nia konfiansa ba se mak lidera estadu, no asume knaar polítiku, tanba ne’e bainhira povu lakon nia vontade atu fo nia opsaun polítika, no depozita nia konfiansa estadu hahú tama iha perigu lakon lejitimidade,” hatete PPN, Aniceto Guterres iha Parlamentu Nasionál (PN) 16/08
Aniceto reforsa tan, bainhira povu sei moris iha obskurantismo no iha presaun oin-oin, liberdade la iha nune’e mós la iha Demokrasia, nune’e bainhira povu no partidu polítiku sira la preparadu didi’ak no lolos hodi kompete iha eleisaun, estadu bele lakon nia soberania no podér polítiku
Iha fatin hanesan hafoin simu posse Presidente CNE, José Agostinho Belo iha intervensaun hateten katak, maski prosesu hili Presidente CNE ho tempu naruk, maibé ho fiar katak sei tau iha kabas ba desizaun kolejiál no foti hamutuk iha plenária sira.
“Fiar ida ne’e ami sei tau iha ami nia kabas, la’ós ha’u mesak tanba CNE servidór estadu, servidór Demokrasia, ami iha na’in 7 no órgaun ida ne’e ho karater kolejiál, desizaun ne’ebé sei foti ligadu ho aktus eleitorál sei liu husi plenária” hatete Presidente atual CNE, José Agostinho Belo
Nia konklui katak atu hetan eleisaun ida dignu no rezultadu ida di’ak, partisipasaun sidadaun hotu liuliu serbisu hamutuk ho Serbisu Tékniku Administrasaun Eleitorál (STAE) maibé ho ida-ida nia kompeténsia
