Reportajen Francisco JDA
Relasiona ho vasinasaun ne’ebé Ministériu Saúde (MS) hala’o iha territóriu laran tomak, liuhusi observasaun ne’ebé Forum organizasaun Naun Governamentál Timor-Leste (FONGTIL) hala’o durante semana tolu observa katak, kestaun asesivel ba ema ho defisiénsia sai nafatin preokupasaun liuliu iha sentru saúde Formoza, Likidoe no Riamari
Husi observasaun sira ne’e FONGTIL anota katak, komunidade barak ezije atu vasina lalais ba doze daruak nian maski tempu seidauk to’o no parte seluk komunidade barak sei trauma atu ba vasina, hanesan iha postu Letefoho no Ermera, nune’e mós fatin balun falta fasilidade ijiene iha fatin vasina nian, inklui kadeira atu ema bele tuur, ida ne’e akontese iha entru Saúde Wailili no Riamare
Tuir Diretór FONGTIL, Daniel Dos Santos hatete katak, komunidade balun nia koñesimentu ki’ik liu atu ba vasina, no fatin vasina dook hosi komunidade sira nia hela fatin, tanba ne’e husu atu kria kondisaun ba ema defisiénsia mós, atu asesu ba vasina iha territóriu nasionál tomak, inklui halo kampaña atu ema hotu bele ba Vasina
“Sei menus partisipasaun no kompriensaun komunidade nian, la iha material ijiene iha fatin vasina no la iha kadeira hodi fasilita komunidade sira bele tuur, nune’e asesivel ba ema ho defisiénsia sei sai nafatin preokupasaun,” hatete Daniel Dos Santos iha salaun FONGTIL, 16/08
Ho situasaun ne’e Diretór FONGTIL rekomenda ba governu, presiza kria kondisaun atu ema ho defisiénsia sira bele asesu vasina iha fatin hotu, liuliu centru saúde Farmoza, Likidoe no Riamare. Presiza mós kampaña ba fatin rural sira, kona ba regra vasinasaun, halo kampaña halakon rumors no harii fali konfiansa komunidade ba fasilidade saúde.
