Reportajen David da Costa Gusmao
Ministeriu Saude (MS) liu husi Sala Situasaun Centru Integradu Jestaun Krize (SS-CIJK) ohin regista tan timoroan nain 3 mate iha izolamentu Vera Cruz, matebian nain tolu ne’e mane 2 no feto 1, sira mate ho tinan 60, 61 no 76.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, informa ohin regista tan obitu nain 3 ka mate nain 3.
“Mane tinan 60 timoroan, hela iha Dili, diagnostikadu iha 15 Agostu 2021, ho síndroma insufisiénsia respiratória aguda (SIRA) tanbá Covid-19 (Teste PCR nia rezultadu pozitivu, Cycle Threshold: E gene 30,4). Metebian iha istória insufisiénsia renal krónika (estádio terminal), no hala’o hemodiálize semana ida dala rua. Matebian iha mós istória ipertensaun arterial ho diabetes,” Dr. Rui esplika liuhusi komunikadu imprensa ne’ebe Neon Metin asesu iha loron, Segunda 16/08.
Nia dehan matebian Transfere ba Vera Cruz iha 14:00 otl no halo tratamentu, tuir protokolu tratamentu ba Covid-19. Maizumenus 17:30 loron 15 Agostu, matebian iis kotu tanbá multiple organ failure. Teste PCR hafoin iis-kotu nafatin pozitivu (CT E gene 31,3).
Alende ne’e mos iha matebian mane seluk, tinan 76 hela iha Dili, diagnostikadu iha loron 14 Agostu 2021, ho sindroma insufisiénsia respiratória aguda (SIRA) tanbá Covid-19 (Teste PCR nia rezultadu pozitivu, Cycle Threshold: E gene 23,3).
“Matebian transfere ba Vera Cruz iha loron ne’e kedas, no halao tratamentu, tuir protokolu tratamentu ba Covid-19. Mais ou menus 19:00 loron 15 Agostu, matebian iis kotu, tanbá thromboembolism pulmonar. Teste PCR hafoin iis-kotu nafatin pozitivu (CT E gene 12,2),” nia esplika.
Nune’e mos iha matebian feto tinan 63 timoroan, hela iha Dili, diagnostikadu iha loron 12 Agostu 2021, ho sindroma insufisiénsia respiratória aguda (SIRA) tanbá Covid-19 (Teste PCR nia rezultadu pozitivu, Cycle Threshold: E gene 21).
Nia esplika tan Matebian ne’e iha istória moras leusemia ho anemia grave. Transfere ba Vera Cruz iha loron ne’e kedas, no halo tratamentu, tuir protokolu tratamentu ba Covid-19. Iha oras tuku 5:30, loron 16 Agusto, nia hakotu iis tanba parajen cardioresporatória. Teste PCR hafoin i’is-kotu nafatin pozitivu (CT E gene 24,4).
Nia salienta familia matebian nain 3 ne’e, koordena ona ho ekipa saúde atu halo funeral tuir protokolu ne;ebé adopta iha Timor-Leste.
Entretantu dadus jeral ba COVID-19 ohin loron 16 Agostu tinan ne’e, kazu foun 117, kazu rekuperadu 41, kazu ativu baixa 2,141 kazu óbitu ohin nain 3 no total óbitu hamutuk 33 no total kazu konfirmadu kumulativu sura husi Marsu 21 2020 to’o mai ohin loron 16 Agostu hamutuk 12,682.
