Reportajen David da Costa
Prezidente Repúblika (PR) José Ramos-Horta konsidera loron 12 Novembru 1991, Masakre Santa Cruz ida ne’e, hanesan loron memória no omenajen ba foin-sa’e sira ne’ebé uluk ho aten-barani, hamrik hodi defende Timor-Leste nian liberdade no dignidade.
Prezidente Repúblika (PR) José Ramos-Horta, dehan, Ohin halibur hamnutuk iha fatin ida ne’e, atu selebra Loron Nasionál Juventude Timorense, data Ida-ne’ebe la’os de’it reprezenta foin-sa’e sira-nia forsa no entuziazmu, maibé mós marka aniversariu ba dala-33 husi eventu ida ne’ebé marka kle’an liu kona ba Timor nian istoria no povu Timor ninia.
“Masakre Santa Cruz. lda ne’e hanesan loron memória no omenajen ba foin-sa’e sira ne’ebé, ho aten-barani, hamrik hodi defende ita-nia liberdade no dignidade,” dehan Prezidente Repúblika José Ramos-Horta, Bainhira halo nia Diskursu iha aniversáriu loron Nasionál Juventude no Masakre Santa Cruz ba dala-33 iha Santa Cruz, Tersa 12/11.
Xefe Estadu dehan, Iha loron 12 fulan Novembru tinan 1991, joven Timoroan sira sakrifika sira-nia an ba rai-doben Timor-Leste, hodi hasoru buat ne’ebé parese imposivel.
“Maibé, ohin ita fó onra-ba korajen ida-ne’e la’os de’it ho liafuan. maibé hodi reafirma ita-nia kompromisu atu fó kbi’it no valoriza foin-sa’e sira ohin nian nu’udar motór ba transformasaun no hametin identidade Timoroan nian,” Xefe estadu esplika.
Xefe estadu esplika tan, Iha Loron Nasionál Juventude ida-ne’e, bainhira Timoroan hanoin hikas eroi no martir sira 12 Novembru 1991 nian, foinsa’e Timor-Leste tenke brani no hetan inspirasaun husi eroi sira ne’ebé maka uluk hamrik hodi luta ba Timor-Leste nia independénsia.
“Ha’u husu ba foinsa’e timoroan ida-idak atu hetan inspirasaun iha aten-barani husi sira ne’ebé uluk liu ita. Ita-boot sira maka erdeiru sira ba legadu sakrifisiu no determinasaun ida-ne’e. La’o ba oin ho korajen, ho kompromisu ne’ebé la nakdoko ba justisa, liberdade no dezenvolvimentu ita-nia rain,” Xefe estadu husu ba Joven foinsa’e sira.
Foin-sa’e sira maka ai-riin ne’ebé maka hari futuru Timor-Leste nian. Atu loron ida ne’e inspira foinsa’e ida-idak atu sai ajente ba mudansa, defensór ba Timor nian ambiente, no sidadaun ne`ebé preparadu atu lori Timor-Leste ba futuru ne’ebé vibrante no sustentável.
