Reportajen Adroaldo “Saretukau”
Oxfam iha Timor-Leste, La’o Hamutuk, Asosiasaun Jornalista Timor Lorosa’e (AJTL), Média Lafaek News no membru Rede Koligasaun Agrikultura, lansa bulletin Media Tour ne’ebe hakerek husi jornalista sira bainhira halo tour ba munisípiu Ainaro no Baucau.
Liuhusi konferénsia imprensa, portavós koligasaun agrikultura, Herminia Pinto hateten hodi bolu governu nia atensaun hodi investe makaas no tau prioridade ba setór agrikultura no setór produtivu seluk.
Herminia dehan programa Média Tour ne’e implementa liu husi Projetu Hadalan ho objetivu atu promove no hametin abilidade lian oin-oin liu husi sosiedade sivíl, rede no aliadu sira, no grupu joven produtivu sira, inklui feto no ema ho defisiénsia agrikultór sira iha munisípiu.
“Ho nune’e, bele iha koñesimentu no kapasidade ne’ebé adekuadu hodi influénsia no kontribui ba planeamentu, programa no polítika governu nian Iiu-liu relasiona ho asuntu diversifikasaun ekonomia, inklui monitorizasaun ba implementasaun politika sira ne’ebé foka ba hametin ekonomia povu ktiik no nasaun nian, hodi investe di’ak Iiu tan iha setór agrikultura no setór produtivu sira seluk”, dehan Herminia iha sentru rekursu Oxfam, 28/07
Liu husi projetu Hadalan, Oxfam kontinua amplifika liu tan lian husi grupu feto, ema ho defisiénsia, no mos joven sira iha nível munisípiu hodi influénsia desizaun sira iha nível polítika relasiona ho asuntu diversifikasaun ekonomia no mos investimentu orsamentu estadu ne’ebé adekuadu iha setor agrikultura no setor produtivu seluk.
Nia hatutan papel média no jornalista importante tebes hodi halo advokasia no edukasaun sívika iha asuntu importante sira, hodi informa no halo influénsia ba makaer ukun sira. Liu husi informasaun sira ne’ebé mak média no jornalista sira foka, hamosu diskusaun publiku no desizaun ne’ebé mak governu foti, hodi responde ba situasaun ne’ebé mak komunidade sira hasoru.
Atu promove no haburas liutan servisu grupu joven sira nian iha nivel munisípiu, Oxfam serbisu hamutuk ho Lafaek News no mos rede koligasaun agrikultura lansa relatóriu ka Bulletin Média Tour, ne’ebé jornalista sira hakerek kona ba istória susesu husi joven produtivu sira, halo serbisu ne’ebé susesu iha sira nia grupu agrikultura, ne’ebé fo benefisiu ba sira nia aan, komunidade, no kria oportunidade servisu ba joven sira seluk hodi kontribui ba ekonomia uma-kain nian no mos promove diversifikasaun ekonomia iha Timor-Leste.
Maske sira iha susesu maibé komunidade no grupu joven sira ne’e sei kontinua hasoru dezafiu oin-oin mak problema infrastrutura béziku sira hanesan estrada ne’ebé kontinua aat, problema irrigasaun, produsaun produtu Iokél sira no difikuldade atu asesu ba merkadu, dehan Herminia liu hosi konferénsia imprensa.
Husi produsaun Bulletin Media Tour ne’e, ho objetivu atu promove setór agrikultura no setor produtivu sira seluk, hodi públiku bele hatene istória susesu sira ne’ebé joven sira halo iha setór agrikultura no ajuda ita nia governu, Parlamentu Nasionál hodi tau importánsia ba setor agrikultura no setor produtivu sira seluk, hodi investe boot Iiutan Iiu husi Orsamentu Jerál Estadu liu-liu OJE ba 2023 nian.
Iha parte sorin, Strategy and Engagement Lead Oxfam Timor-Leste, Adilson da Costa Junior hatete, servisu Rede koligasaun agrikultura mak kontinua halo advokasia hodi influénsia governu nia programa no orsamentu estadu hodi investe iha agrikultura. Nia mos apresia ba Ministériu Agrikultura no Sekretária Estadu Juventude no Desportu ne’ebé iha programa balun ne’ebé apoiu juventude sira nia aktividade iha seitor produtivu.
“Iha tinan ida ne’e apresia ba governu nia investimentu, liu-liu, Ministériu Agrikultura ne’ebé tau osan oi-tuan ba joven sira ne’ebé halo servisu iha seitor agrikultura inklui mos Sekretária Estadu Juventude, sira iha programa balu liga ho joven agrikultura iha área rural, nomos MTCI ne’ebé iha programa espesífiku balu hodi apoiu joven emprendedorizmu sira, liu-liu joven sira ne’ebé mak iha kreatividade nomos halo ona investmentu ona iha seitor agrikultura no halo indústria prosesamentu sira i alein de ne’e mos Sekretária Estadu Kooperativa mos iha programa balu ne’ebé foku ba oinsá atu apoiu joven sira hodi servisu hamutuk, kria kooperativa ne’ebé bele habelar liu tan, ka haforsa liutan kreatividade ne’ebé sira halo iha sira nia grupu,” dehan Strategy Lead Oxfam, Adilson iha konferénsia imprensa ne’ebé hala’o iha edifísiu Oxfam, Hudi-Laran.
lnformasaun no dadus hirak ne’e prodúz husi jornalista na’in 10 ne’ebé reprezenta media imprime no eletrónika hodi partisipa iha média tour, hodi halo kobertura kona ba susesu no dezafiu sira ne’ebé komunidade no joven sira enfrenta iha setor agrikultura iha munisipiu Ainaro no Baucau.
