Reportajen Juvinal Cabral dos Santos
“Se kaer de’it bandeira iha fatin públiku ne’e laos krime, no la viola ema ida nia direitu nune’e mak sira konsidera atuasaun la tuir dalan legal, no kontra Lei la tuir prinsipiu estadu direito demokratiku”. Paulo
Lori Bandeira husi Palestina, Membru Frente Maunbere Ba Solidariu Internasionál (FMSI): Paulo dos Santos Soares no Nelson Roldao Xavier, hetan baku husi membru Polísia Nasionál Timor-Leste (PNTL), iha konsertu Públiku 12 de Novembru.
Ba Neon Metin iha Ministeriu Publiku iha loron 15/11, Paulo haktuir katak iha oras tuku 06:00 lokraik, Paulo h onia maluk sira akompana konsertu loron 12 de Novembro nian, no konsertu hahu 20:00 resin, “ami kaer bandeira akompanha konsertu iha 10 minutu hanesan ne’e, intelejensia sira hadau bandeira husi ami nia liman no la sente iha proplema ruma iha hanoin orsida mak ita husu fali Bandeira.
Nia haktuir la kleur tan intelejensia ida mai hakuak kolega ida lori sai ba liur, liu de’it minutu balun intelejensia ida mai hakuak nia lori sai tan ba liur tula sa’e tiha ba kareta leten depois mak intelejensia sira kontaktu polisia Eskuadra Nain Feto
“Polisia sira mai hatun ha’u husi kareta intelejensia nian mak oknum polisia ida baku Stik ba ha’u nia kabun hafoin hatama ha’u ba kareta laran hodi tula ba Eskuadra Nain Feto, ha’u foin tun husi kareta sira tebe dala tolu iha ha’u kotuk maibe la konsege identifika se mak tebe tanba polisia barak mak lao iha kotuk.”
Paulo hatutan momentu sei iha kareta intelejensia nian laran, akuzasaun oin-oin ne’ebe hateten ba nia hanesan liafuan terorista, milisia, Islam obriga nia tenke dehan hela iha Kampung alor, maibe nia hateten la hanesan ne’e, banhira nia to’o prosesu investigasaun lao hela, PNTL ida hamriik iha nia kotuk basa tan nia dala ida.
Nia deklara loke bandeira ne’e nudar sentimentu espresaun ema ida nian, povu ida nian hanesan ita ba povu Palestina ne’ebé mak hetan apresaun no torturasaun husi militar Israel sira halo tanba ne’e mak sira halo solidaridade kaer bandeira Palestina rua ho bandeira Timor-Leste ida iha fatin konsertu maibe la pertuba atividade
Nia kestiona, se kaer de’it bandeira iha fatin públiku ne’e laos krime, no la viola ema ida nia direitu nune’e mak sira konsidera atuasaun la tuir dalan legal, no kontra Lei la tuir prinsipiu estadu direito demokratiku tanba ida ne’e mak sira aprezenta keixa ba Ministeiro Públiku Munisipiu Dili.
Entretantu relasiona ho kazu refere, vitima Paulo dos Santos Soares no Nelson Roldao Xavier, konsidera atuasaun husi membru PNTL la justu, nune’e sira hato’o keixa ba Ministériu públiku Munisípiu Dili.
