Reportajen Silvino Freitas
Ekipa Lorico Adventure (LOAD) realiza eventu Dalan ba Memoria hala’o viajen haleu teritorio nasionál hodi komemora loron masakre santa cruz no loron juventude, ekipa LOAD hala’o vizita ba sobrevivente masakre santa cruz ho nia família sira nomós vizita rate joven sira ne’ebé mate iha masakre santa cruz no joven sobrevivente sira ne’ebé mate ikus, nune’e eis Prezidente da Republika Francisco Guterres ‘Lu-olo’ enkoraja joven foin-sae sira atu hakbiit an nafatin hodi hadi’a nasaun RDTL.
Lorico Mean responsavel ekipa LOAD dehan, masakre santa cruz mak fatin ne’ebé joven sira sakrifika sira nia an hodi hatudu ba mundu katak Timor Leste hakarak sai nasaun ida independente hodi eziste nuudar nasaun soberania ida hodi sai husi okupasaun Indonesia nian.
“Ami hanesan jerasaun foun hakarak kontinua saida mak ami nia maun ho aman sira halo iha 1991 hodi fo valor ba sira nia kontribuisaun liberta rai ida ne’e” dehan responsavel ekipa LOAD iha komemorasaun loron masakre santa cruz 1991 no loron juventude iha semiteriu santa cruz Dili, (12/11).
Nia dehan, ekipa LOAD nia viajen haleu munisípiu ne’e hodi vizita saudosu sira ne’ebé mate ba ukun an nia rate liuliu sira ne’ebé mate iha 12 novembro nune’e sira labele haluha ita no ita mós labele haluha sira nia sakrifisiu tomak ba ukun an ida ne’e, nune’e tau matan nafatin ba juventude atu bele kontribui ba dezenvolvimento.
“Iha ami nia vizita ne’e mos vizita maluk sobrevivente masakre 12 novembro ne’ebé dadaun ne’e sei moris ne’ebé dadaun ne’e namkari iha Timor Leste laran tomak, balun ne’ebé mate ikus ami ba vizita sira nia feen ho oan atu sira nia família labele sente mesak” dehan Lorico-mean.
Lorico-mean dehan eventu LOAD ne’e hanaran dalan ba memoria no iha tinan ne’e eventu haleu teritorio Timor Leste lao ba dala hitu ona.
Nune’e eis Prezidente da Republika Francisco Guterres ‘Lu-olo’ enkoraja joven foin-sae sira atu lori nafatin servisu ba RDTL hodi banati tuir joven sira ne’ebé uluk kontribui no sakrifika sira an ba indepedénsia Timor Leste nian.
“La’ós dehan atu fo tan fali ita nia vida maibé tenke iha kbiit nafatin, hodi hadi’a ita nian rain” dehan eis PR Lu-olo iha komemorasaun loron masakre santa cruz, (11/12).
