Reportajen David da Costa Gusmao
Ministeriu Saude (MS) liu husi Sala Situasaun Centru Integradu Jestaun Krize (SS-CIJK), ohin regista pasiente Covid-19 nain 5 ne’ebe mak halo tratamentu iha sala izolamentu Vera Cruz iha situasaun grave, nain ida uza ventiladór no nain 4 uza oksijéniu.
Koordenador Forsa-Tarefa ba Prevensaun no Mitigasaun Surtu Covid-19 iha Timor-Leste, Dr. Rui Maria de Araújo, informa iha loron 16 Agostu tinan ne’e, iha izolamentu Vera Cruz halo tratamentu ba kazu detetadu nain 41. Iha área obstetrisia nain 12, medisina interna nain 21, sirurjia nain 6 no pediatria 2.
“Sira nain 12 iha obstetrisia, kategoria leve hotu. Husi sira nain 21 iha medisina interna, 5 kategoria grave, nain 1 uza ventilador no nain 4 uza oksijéniu. Nain 13 kategoria moderadu,3 kategoria leve,”Dr. Rui esplika liu hosi komunikadu imprensa ne’ebé Neon Metin asesu iha loron, Segunda 16/08.
Nia dehan husi horiseik mai ohin loron 8 Agostu tinan ne’e, Laboratóriu Nasionál Saúde halo testes Polymerase Chain Reaction (PCR) hamutuk ema nain 323 iha Dili no horseik iha munisipiu sira seluk, REAOA ho HNGV halo teste PCR ba ema hamutuk 210.
Entertantu dadus jeral ba COVID-19 ohin loron 16 Agostu tinan ne’e, kazu foun 117, kazu rekuperadu 41, kazu ativu baixa 2,141 kazu óbitu ohin nain 3 no total óbitu hamutuk 33, total kazu konfirmadu kumulativu sura husi Marsu 21 2020 to’o mai ohin loron 16 Agostu 2021 hamutuk 12,682.