Home Analisa Kritika ba Ezistensia Eskola sira ohin loron Comercionalização ba Educação

Kritika ba Ezistensia Eskola sira ohin loron Comercionalização ba Educação

2155
0
Hakerek nain Jonathan Gonsalves. [Foto: Dokumentu privadu | 11.11.2020]

Hakerek nain Jonathan Gonsalves

Edukasaun Timor-Leste ohin loron, infelismente nia orientasaun ba liu kuantidade duke kualidade, no Eskola (Le’e: eskola superior) balun, koko hodi haklot papel Edukasaun ida lolos, hanesan Autor livru “Think on These Things”, Krishna Murti hateten, edukasaun la’os deit atu orienta ema hodi remata nia estudu maibé oinsa eduka hodi bele intende katak estudande iha nia “propósitu de vida”. Signfika edukasaun la’os deit para atu orienta ema hodi bele hetan servisu ate orienta ema hodi forma klase social maibé oinsa atu funda ema nia karakteristiku, no parte hosi transformasaun ba kultura (onestidade, responsabildade, respeita, no valor seluk ne’ebé funda ema ba diak).

Orientasaun klaru sobre edukasaun, maibé ho mudansa globalizasaun ohin loron, ema lubun balun hahu atu transforma edukasaun hanesan atividade negosiu ida ne’ebé iha nia valor ekonómiku. Timor-Leste ohin loron, eskola privado (Pre-Eskolar to’o Ensino Baziku) la’os ona hanesan tinan sanolu liu ba, nia numeru hahu sa’e, no lais liu kompara ho ita nia produtu internu bruto (PIB – volatilidade), hanesan mós eskola superior. Kada tinan eskola superior sira hanesan kompete hodi “soe sai” nia estudante sira ne’ebé ramata nia estudu, balun gradua ema nain 200 to’o 700 resin, numeru ne’ebé bot. pergunta mak, oinsa ho nia kompetitividade?

Fenómena lubuk ida ne’ebé akontese, ate estudante balun (bele dehan maioria) la foti sai kestaun, no tolera aktu sira ne’e hanesan buat normal iha ambitu edukasaun. No hau koko hodi hakerek pontus balun ne’ebé persija hodi krtika, iha eskola privadu balun no labele admira mak akontese mós ho eskola públiku balun, no mais pior liu, Ministru Ensino Superior afavor ba pratika balun ne’ebé hau konsidera esplora povu:

  • Audensia dala ida to’o dala tolu, hahu ona izame final (Indonesia: TAS) – Eskola Superior Privadu balun.

Fenómena ida ne’e sempre akontese (espera katak la akontese mós ho eskola sira seluk, maibé hau rona dehan atu hanesan ka seblas-dua belas), iha eskola superior balun, no problema sempre hato’o ba jerente sira inklui mós senadu hanesan ponte entre estudante ho jerente eskola, maibé infelismente sempre repete. Manorin balun abondona sein klarifikasaun, no balun mós labele ezerse nia dever hanesan manorin, tanba labele fahe tempu. Loron ida manorin ida bele aprezenta materia to’o dala hat no lima, ho materia ida que diferente, oinsa manorin ida bele prepara materia hat to’o lima iha loron ida que hanesan ba estudante ho klase ka semester diferente? nune’e la konsege hanorin tuir orariu ne’ebé iha. Hanesan mós nia metodo hanorin, manorin balun (Eskola superior ida dalaruma iha manorin ida deit no dalaruma mós laiha liu) la konsege enganha hodi iha dialogo entre estudante, oinsa atu diskuti konaba siensia ka materia liga ba kontekstu (Ezem: asuntu ekonómia iha kontekstu Timor-Leste), ate manorin balun hanesan prepara materia para atu responde deit orariu no silabus ne’ebé konkorda ho jerente eskola. Se nune’e oinsa atu responde no prepara rekursu umanu ida que kompetitivu? klarifikasaun ne’e bele justifika pergunta iha paragrafu segundu.

Eskola sira tenki muda nia pensamentu no labele kontenti bainhira estudante konsege akaba nia estudu ho kuantidade bot, maibé la konsege kompete iha merkado, satan globalizasuan ohin loron, kompetisaun mais avansadu. Eskola sira mós persija no tenki aperta estudante ne’ebé la konsege ejerse nia án hanesan estudante (estuda, aprezenta nia trabalho no izame ikus hodi remata nia estudu – monografia), tanba hosi hau nia observasaun hatudu, la’os minimiza maibé eskola iha papel no iha direitu absolute atu obriga estudante hodi responsabiliza nia án hanesan ema estudante, no tenki garantia atu responsabiliza nia teze, se eskola ne’e rasik hanoin fali tanba estudante selu lubuk ona, no lakoi atu estudante hela (la pasa) oinsa eskola bele responde prisipiu edukasaun konaba libertasaun?

  • Laiha atividade ektrsakurikuler maibé kada semester tenki selu – Eskola Superior Privadu.

Substansia hosi ekstrakurikuler, mak oinsa atu haklean estudante nia koiñesimentu no parte ida hodi hatene estudante nia talentu hodi karakteriza estudante. Persija hanoin nafatin katak, papel edukasaun idak mak karakteriza estudante.

Bainhira hahu rejistrasaun hanesan estudante foun, eskola sempre fahe brosura ne’ebé hakerek klaru ona ba kada item ne’ebé persija hodi selu, no atividade ekstrakurikuler parte hosi ne’e no tenki selu kada semester. Maibé infelismente durante hala’o estudu, la hetan atividade ida ne’e, no karik iha mós bainhira iha iventu ruma iha eskola, no ba estudante balun deit, depois estudante sira ne’ebé selu atividade esktrakurikuler kada semester, selu atu hetan saida? Karik eskola hanoin katak husik deit tanba estudante mós la preokupa maibé imajina kada semester porezemplu estudante ida selu $10 hodi multiplika ba estudante rihun rua ka rihun tolu. No atu karakteriza estudante liu hosi atividade ekstrakurukuler mak ida ne’ebé.

  • Laiha livru mata dalan ba estudante maibé tenki selu – Eskola Superior Privadu.

Livru mata dalan ba estudante, hanesan forma ida ne’ebé atu guia estudante hodi hatene nia direitu no dever sira durante hala’o nia estudu, maibé infelismente to’o ona semester nen to’o hitu mós seidauk hetan livru mata dalan, ate estudante balun to’o remata nia estudu. Nune’e estudante rejisti hodi husu nia direitu, to’o ikus eskola tenki deskonta bainhira estudante selu nia osan semester, maibé balun ne’ebé remata pasensia labele fó fila ona nia osan.  

  • La utiliza sala (edfisiu eskola) maibé tenki selu (durante Covid – 19 fulan tolu) – Eskola Ensino Baziku privado balun.

Surtu Covid-19 konsege halo ema hotu preokupa, la’os deit hosi parte saude, maibé implika ka afeita mós ba atividade lubuk ida, inklui mós edukasaun, nune’e iha kuaze fulan tolu nia laran (Inisiu fulan marçu to’o Junhu nia rohan), bainhira S.E. Presidenti da Repúblika Timor-Leste dekreta Estadu Emerjensia iha fulan marçu 2020, hodi limita ema nia movimentu, inklui movimentu ba eskola. Estudante sira tenki hetan deit materia via online. Nune’e automatika estudante labele utiliza sala, Maske nune’e eskola balun sei aplika ka obriga nafatin estudante sira hodi selu osan aulas nian (Uang gedung), no bainhira husu klarifikasaun ba jerente eskola tanba sá tenki selu nafatin, eskola nia resposta mak, “ami gasta ona osan lubuk ida hodi hari’i”.

No eskola ne’e rasik aplika kada tinan tenki selu osan edifisiu nian, balun selu $200 no balun mós liu ida ne’e, depende ba inan-aman nia servisu, no bainihra husu tanba sá tenki selu nune’e, nia resposta hanesan iha leten.

  • Durante Covid-19, fulan tolu estudante hetan deit materia via online maibé tenki selu hanesan fulan bain-bain – Ensino Baziku

Emprinsipiu apresia ba eskola privadu sira balun, ho razaun durante estadu emerjensia, eskola kontinua nafatin hodi ejerse nia dever hodi haruka materia via online (maske dalaruma naran prepara deit pergunta hodi haruka ba estudante) atu estudante nafatin estuda hodi labele haluha materia sira ne’ebé konsege hetan ona antes estadu emerjensia. Iha aspetu ida ne’e, eskola la konsege ejerse nia dever hanorin durante oras hat to’o lima, prepara deit materia no haruka, maske nune’e, eskola nafatin obriga hodi estudante tenki selu tuir hanesan fulan bain-bain, ate iha estadu emerjensia nia laran mós, eskola nafatin haruka karta atu estudante tenki selu eskola nafatin.

Atu justu iha ne’e, eskola tenki konsientimente katak, eskola la konsege ejerse nia dever ho nakonu (hanorin durante oras hat to’o lima,), no tenki iha pontu toleransia iha prosesu pagamentu maibé eskola lakoi preokupa, no depois husu klarifikasaun, eskola nia resposta laiha diferensia ho resposta sira iha leten, ate hatete, se lakoi hodi selu, bele buka fali eskola seluk, diferente ho eskola balun, balun konsientimente hodi redus.

Ate durante fulan tolu nia laran laiha atividade iha eskola tanba aplikasaun Estado Emerjensia no estudante tenki iha uma hotu, maibé fulan tolu ne’ebé laiha atividadade eskola mós jerente eskola obriga estudante hodi selu osan atividade. Esplorasaun ida que mais malorek. Ate hau labele imajina, oinsa eskola obriga hodi selu enkuantu durante fulan tolu, estudante simu material via online no nunka tama eskola hodi hala’a atividade.

Iha livru propinas kada fulan, alen de selu propinas, iha item rua mak tenki selu kada fulan, hanesan propinas no mós atividade nian (la espesifiku maibé eskola prefere ba ekstrakurikuler nudar atividade), kustu ba ida ne’e mós eskola sira obriga hodi selu maske durante fulan tolu ho balun estudante laiha atividade ruma tanba aprendizazen iha aula paradu total. Aneh bin ajaib.

  • Eskola Ensino Baziku Publiku balun, aplika osan ba estudante rejistu foun.

Iha konstituisaun RDTL artigu 59, hakerek klaru katak ema hotu iha direitu hanesan hodi asesu ba edukasaun, no bainhira bele eskola públiku bele saugati ka seidauk halo tarifa ka selu. Ate ohin loron, estadu sei fó sidadaun hotu hodi asesu edukasaun ho gratuita hahu hosi ensino baziku to’o sekundaria. Infelismente, eskola balun ignora tia, no hahu halo tarifa ba estudante sira bainhira hahu rejistrasaun. Se eskola públiku ne’ebé iha kontrola hosi estadu no seidauk aplika tarifa, maibé balun aproveita, oinsa ho eskola privadu sira ne’ebé iha regulamentu rasik hodi aplika tarifa? Pergunta ne’e bele responde hosi estudu kazu sira iha leten.

Depois akonpanha fenomena sira ne’ebé akontese, hahu hosi eskola públiku to’o eskola privadu, obriga hau hodi hakerek konaba topiku iha leten. Tanba sá edukasaun sai nune’e, hosi pontu hirak ne’e, hatudu edukasaun iha ona valor ekonomiku ida que bót, nune’e transforma tia edukasaun ida tuir lolos hodi liberta ema, maibé sai mós hanesan fatin hodi akumula capital. No pratika sira hanesan ne’e, parte hosi eksplorasaun no colonial foun ida. Viaviliza tia sistema hodi obriga tenki tuir.  No iha tempu hanesan ema hotu hakarak iha edukasaun ida que kualidade, laiha opsaun hodi hili, liu-liu eskola privadu sira, nune’e eskola privadu sira kontinua iha zona aman hodi dada tarifa konforme hakarak. No eskola sira hahu mós adopta prinsipiu ekonómia, ne’ebé tenta hodi hasai kustu naton (Le’e: Selu profesores no hari’i aulas) maibé hakarak hodi hetan retornu boot.

Labele admira mak, akonpanha iha media online ida (Tempo Timor), S.E. Ministru Ensino Superior Siensia no Kultura, Sr. Longuinhus dos Santos katak, Dever estudante nia estuda no selu[1]. Los duni, no ne’e responsabildade hanesan estudante tenki, hau mós konkorda, maibé S.E. Sr. Ministru mós labele haluha katak, entre DEVER ho DIREITU sempre la’o hanesan, oinsa Ministru ida bele hasai estetmentu ida que ho kualidade hanesan ne’e, enkuantu tuir lolos Ministeriu persija investiga tanba sá estudante reklama lakoi hodi selu propinas. Fulan tolu ho balun nia laran, estudante labele simu materia ho nakonu, ne’e direitu absolute ne’ebé estudante tenki hetan (simu materia durante oras 4 to’o 5) inklui mós eskola superior sira ne’ebé la konsege hetan materia iha oras 2 ho balun nia laran. Ida ne’e S.E. Ministru konsidera efetivu?

Tuir lolos, S.E. Ministru Ensino Superior Siensia no Kultura, persija iha estudu ruma no haruka peritu ka asesor sira iha Ministeriu hodi halo polítika ida que justu no tenki kontrola ho rigor ba eskola privado sira inklui eskola superior sira, tanba kada tinan eskola privado sira mós asesu ba subsidiu kuaze tokon US$2, atu evita eskola sira komersionaliza tia edukasaun, tanba iha valor ekonomiku.

Ate eskola Internasional sira balun, espasu hodi estudante halimar mós laiha, maibé konsege loke eskola no konsidera Eskola Internasional, ate nia kantina barak liu fali boblioteka, no biblioteka nia medida kiik liu fatin kantina.

Ministeriu Edukasaun iha papel importante hodi kontrola no tau matan, tanba eskola privado sira mós asesu hotu subsidiu hosi governu kada tinan, kuandu Ministeriu edukasaun mak la konsege ejerse nia funsaun, eskola privado sira sei kontinua uza nia poder hanesan saida mak S.E. Ministru Ensino Superior Siensia no Kultura, Sr. Longuinhus dos Santos hateten katak, Governu laiha kompetensia hodi define valor propinas ba universidade sira, nune’e Eskola Superior sira sei kontinua avontade hodi dada tarifa maske semester ida dala ruma hanorin dala rua no dala tolu tenki halo ona izame final (Indo: TAS).

Ho fenómena sira ne’e, papel Ministeriu Edukasaun importante tebes hodi haree no halo avaliasaun ida ke profundu tanba edukasaun hanesan asset ida que inportante hodi determina kualidade rekuru umanu, no rekursu umanu determina nasaun atu orienta nasaun ba ne’ebé. No tenki halo standarizasaun valor no persija kontrola atu eskola privado sira labele aproveita hodi dada tarifa ba estudante konforme hakarak, no tenki razoavel. Se la’e, eskola sira kontinua esplora liu hosi meus formal no legal.


[1] Tempo Timor, Longuinhos: Devér Estudante Nian Estuda no Selu Propinas, https://tempotimor.com/edukasaun-kultura/3476-longuinhos-dever-estudante-nian-estuda-no-selu-propinas?fbclid=IwAR0nVXebckF9USUg0HwDuu_jquMFdKLVw2QyJIbIqegMf9lgY19nMtZbdus#.X18FtMiEQQo.facebook, 12 Setembru 2020.

Print Friendly, PDF & Email

LEAVE A REPLY

Please enter your comment!
Please enter your name here