Reportajen Silvino Freitas
Konferénsia Asosiasaun Jornalista Timor Leste (AJTL), lori Amitu Qonusere Araújo no Lirio Fonseca kompete ba restante mandatu 2021-2025, reprezenta AJTL iha Konsellu Imprensa (KI), hodi troka Virgilio Guterres, konferénsia refere reprezentante ne’e eleítu liuhusi votus 66, husi konferensista sira no Lirio derrota ho votus 38.
Konselleiru Jornalista eleitu dehan, sei nafatin defende liberdade imprensa no espresaun, no saláriu mínimu ba jornalista sira inklui halakon lia-fuan rasizmu ba jornalista Timor Leste.
“Hau foin eléitu husi konferensista sira, sei ko’alia kona-ba saláriu mínimu no defende nafatin liberdade imprensa no espresaun iha konsellu imprensa” dehan Amito hafoin eléitu iha salaun Delta-Nova, (27/01).
Nia dehan kna’ar jornalista ne’ebé hala’o, sei bazeia hotu ba lei komunikasaun sosiál maka vigora iha estadu RDTL, tanba lei ne’e maka esplika klaru liu kona-ba dezafiu no obstákulu mak jornalista sira enfrenta.
“Desizaun saida de’it maka ita iha sei aprezenta no diskute iha reuniaun plenária nian, ha’u mós optimista katak programa hotu ha’u iha sei lori hotu ba konsellu imprensa” nia promete.
Entretantu konferensista ne’ebé tuir eleisaun mai husi membru AJTL husi média públiku no privada ho totál votus 105, maka hili hikas nia konselleiru ba KI, hodi substitui Virgílio Guterres ne’ebé rezigna-an, tanba asume ona kargu nu’udar Provedór ba Direitu Umanu no Justisa (PHDJ) nian.
