Reportajen Adroaldo “Saretukau”
Ministra Estadu Reinu Unidu ba Indo-Pasífiku, Anne Marie Trevelyan hasoru malu ho Primeiru Ministru, Xanana Gusmão iha Palásiu Governu, sesta-feira, (29/09) ko’alia konabá relasaun externa, dezenvolvimentu ekonómiku no Reinu Unidu nia suporta ba Timor-Leste nia adezaun ba ASEAN.
Ministra Trevelyan hato’o obrigadu ba Primeiru Ministru Xanana nia ben-vindu jenerozu ba Reinu Unidu nia Ministra mai Timor-Leste desde ninia independénsia. Nia hakarak haforsa relasaun no suporta adezaun Timor-Leste nian ba ASEAN.
“Ha’u hatene katak, ita-boot servisu tinan barak ona, hakarak haforsa tan relasaun ida ne’e, hanesan ami bele suporta imi nia adezaun ba ASEAN, ba imi nia dezenvolvimentu ekonómiku, no sai hanesan oportunidade ba imi nia nasaun extra-ordináriu, imi nia biodiverisdade, no imi nia sentralidade sei lori imi nia futuru sidadaun nian, prazer tebes mai iha ne’e.” Hato’o Ministra Trevelyan.
Hatan ba Neon Metin nia pergunta oinsá Reinu Unidu nia suporta ba adezaun Timor-Leste nian ba ASEAN, Ministra ne’e hatan, “Ami servisu tiha ona ho dalan balu, atu ajuda programa lian Inglés, ami hein atu servisu ho dalan balu tan hanesan imi nia governu servisu ba iha roadmap hodi adere, no ha’u nia ekipa iha Jakarta sei kontinua ida ne’e.” Nia dehan.
Ba sorumutu ne’e, Xanana agradese ba apoiu tomak Reinu Unidu nian mai Timor-Leste to’o ohin loron, no nia dehan katak Reinu Unidu prontu kontribui ba Timor-Leste nia dezenvolvimentu.
“Mai atu ko’alia ho ita konabá situasaun agora, situasaun futuru, liu-liu mos sira hatene ita atu tama iha ASEAN i iha kestaun de komérsiu, investimentu, buat sira ne’e hotu, ami mai para troka informasaun ba malu.” Dehan Xanana hafoin sorumutu ho Ministra Trevelyan.
Ba kestaun adezaun, Xanana informa Kata Ministra Trevelyan hatene katak ita atu tama ASEAN, ita presiza rekursu umanu ne’ebé di’ak, tanba ne’e sira sei apoiu ba ida ne’e.
“Embaixador (Reinu Unidu) mos dehan, sim, bele hamutuk ho ita nia Ministériu, Embaixada, prepara ita nia ema sira para kuandu ita tama iha ASEAN la’os ba rona de’it, fila-fali mai dehan, ami la komprende buat ida mas ba ona ho kbiit atu envolve aan, atu ko’alia, fo hatene ita nia hanoin, ita nia situasaun ba iha ASEAN, tanba ita iha de’it tinan ida atu prepara.”