Reportajen Joselina dos Santos
Asosiasaun Hak servisu hamutuk ho grupu ema Holanda inagura monumentu Saudozu Sander Robert Thoenes ne’ebe mate ho idade 27 tanba hetan oho husi Militár Indonézia no Milísia Otonomia sira iha loron 21 Setembru 1999 iha Igreza Sagrada Coração de Jesus Becora nia oin. Militar Indonézia sira oho nia bainhira nia hala’o knaar nu’udar Jornalista iha tempu invazaun Indonézia hodi divulga sai luta Timoroan nia terus no ukun rasik-aan atu dada atensaun mundu internasional nian.
Iha Seremonia Inagurasaun, Diretór Ezekutivu Asosiasaun HAK, Feliciano da Costa Araújo, hateten, iha Saudozu Sisto dos Santos nia vida halo ona komunikasaun ho Paroquia Becora nomós ho familia Sander Robert Thoenes nian, oinsa atu haree ba monumentu ne’ebé Sander husik nia vida ikus iha Timor-Leste hodi dedika nia aan hanesan Jornalista Profisionál ida hodi divulga informasaun ba iha mundu internasional.
“Iha komitmentu ne’ebé Saudozu keneke husik hela, ida ne’e mak loron ohin komitmentu refere ita realiza iha fulan no tinan ida ne’e. Asosiasaun Hak iha nia ekipa tomak inklui aliadu sira ami agradese tebes ba biban ida ne’e, tanba bele fó fatin ba ami hodi harii monumentu rekoñese boot Sander nian ba iha kanaar hanesan Jornalista”, dehan Diretór Asosiasaun Hak iha Igreza Sagrada Coração de Jesus Becora, kuarta 08/10.
Iha fatin hanesan, Reprezentante Grupu Ema Holanda, Hily Bguwman, hatutan, durante ne’e Grupu Ema Holanda servisu hamutuk ho Asosiasaun Hak liuhosi Matebian Sisto dos Santos planu ona atu halo monomentu foun. Monumentu Saudozu Sander nian hanesan simbolu ida hodi fó inspirasaun ba jornalista nomós ba ema hotu atu labele haluha imi-nia liberdade no imi nia dezafius.
“Ami agradese ba parte hotu liu-liu Paroquia Becora, tanba fó espasu hodi bele harii monumentu Sander nian, agradese mós ba Sander nia kolega internasional ne’ebé fó apoiu fundus hodi halo monumentu. Agradese mòs ba matebian Sisto dos Santos meske fila ona ba mundu seluk ne’ebé servisu barak hodi halo monumentu foun Sander nian”, nia agradese.