Reportajen Joselina dos Santos
Relasiona ho Jornalista Sander Robert Thoenes ne’ebé hetan oho husi Militár Indonézia no Milísia Otonomia sira iha loron 21 Setembru 1999, nia hala’o nia pápel hanesan Jornalista hodi sai matan no tilun ibun ba povu Timor-Leste hodi luta ba Independensia ukun rasik-aan, tanba ne’e Konsellu Imprensa konsidera hanesan heroi informasaun ba povu, nune’e sei esforsu hodi tau prémiu ida ba Sander nian.
“Jornalista Sander Robert Thoenes Pesoalmente ha’u mós parte husi nia, tanba iha momentu ne’eba ami hamutuk la’o haleu sidade Díli, maibe bainhira nia mate ami laiha oin atu haree direita ba nia terus. Hanesan Jornalista iha buat tolu mak hanesan prontu sai vitima ba tempu, prontu sai vitima ba materia no prontu sai vitima ba aan rasik ida ne’e mak Sander nia rezultadu mate”, dehan, Presidente Konsellu Imprensa, Otelio Ote, iha Igreza Sagrada Coração de Jesus Becora, Kuarta 08/10.
Nia haktuir, luta ne’ebé belit iha Jornalista sira-nia isin mak lialoos, bainhira konsege hetan lialoos sente todan hotu iha nia oin no iha nia isin kaman. Iha Timor sira atende hela Saudozu Sander no kolega sira seluk ne’ebé mate iha Timor hamutuk ho Jornalista na’in lima ne’ebé mate iha 16 fulan Otumbru 1975 iha Balibo, Jornalista Timor konsidera sira hanesan heroi informasaun ba povu no nasaun Timor-Leste.
“Konselu Imprensa hanesan orgaun ne’ebé reguladór sai ambrela ba média no jornalista no konsidera mós ba jornalista sira ne’ebé mate iha Timor, tanba oferese sira-nia aan hodi ajuda povu luta ba independensia. Tanba ne’e am li sei haree kada tinan, kuandu selebra loron nasional ka loron internasional liberdade imprensa loron 3 Maiu ami sempre vizita fatin ida ne’e hodi relembra Sander nia mate fatin ne’e”, nia esplika.
KI Lori instituisaun média hotu nia naran, agradese tebes ba familia Sander, espera katak relasaun entre jornalista Timor-Leste ho Sander nia familia la kotu no kada tinan sei kontinua aprosima jestu ida ne’e. Seidauk iha premiu ne’ebé tau naran Sander, nune’e KI planu ona katak atividade tuir mai kopera hamutuk ho jornalista sira ne’ebé koñese no Sander nia familia hodi bele hamosu premiu ba Sander nian.
