Reportajen Zevonia Vieira
Banku Dezenvolvimentu Aziátiku (ADB) no Organizasaun Nasoens Unidas ba Programa Alimentar Mundial (WFP), asina ona Akordu Administrativu hodi kontribui ba projetu avaliasaun boot iha Timor-Leste, ne’ebe foka liu ba seguransa ai-han to’o ohin loron, ho apoiu fundu husi ADB liu husi inisiativa Estudu Diagnóstiku Ekonómiku iha Ázia no Pasífiku.
Liuhusi komunikadu imprensa ne’ebe Neon Metin asesu husi WFP, informa katak Inisiativa husi projetu peskiza ida ne’e sei kobre uma kain 9,000 resin, fasilita Governu Timor-Leste atu hetan dadus krusiál, hodi hatan ba preokupasaun nível falta seguransa ai-han. WFP sei fornese apoiu tékniku ba governu hodi halo avaliasaun ne’ebe foka liu ba seguransa ai-han iha eskala ne’e – ne’ebe mak boot liu hala’o iha rai laran.
Diretora ADB iha Timor-Leste, Stefania Dina, hateten “Ami kontente halo parseiru ho governu ho WFP ba servisu importante ida ne’e. Timor-Leste sei hasoru nafatin problema ho nível malnutrisaun ne’ebe aas iha mundu. Importante tebes atu tau atensaun ba problema falta seguransa ai-han atu asegura katak populasaun iha asesu ba ai-han sufisiente no nutritivu.”
Avaliasaun ne’e sei estabelese análize kle’an kona-ba nível falta seguransa ai-han husi populasaun iha munisípiu 14, no mos iha nível nasional. Ida ne’e mos sei deside padraun konsumu ai-han ba uma kain, tipu ai-han saida mak família sira konsumu, no estratejia sobrevivénsia prinsipal ne’ebe mak família sira adopta hodi hatan ba problema atuál ho kustu ai-han aas los no mudansa klimátika mai derepenti durante tinan kotuk.
Alba Cecilia Garzon Olivares, Diretora no Reprezentante WFP iha Timor-Leste, hato’o pontu importante husi projetu ne’e: “Avaliasaun ne’e la’os deit kona-ba númeru dadus; ida ne’e kona-ba fornese dadus krusiál ho tempu ne’ebe loos hodi informa Governu Timor-Leste ba desizaun kona-ba preparasaun ai-han emerjénsia, alokasaun rekursu, no intervensaun protesaun sosial.”
Deskobrimentu hirak ne’e mos sei kontribui ba planu klasifikasaun falta seguransa ai-han agudu IPC nian ba 2023/24 and sei uza hodi determina númeru ema falta seguransa ai-han ne’ebe aumenta desde análize ikus IPC ba 2022/23, hala’o iha Novembru 2022. Rezultadu foun IPC nian sei publika iha inísiu 2024.