Reportajen Joanina Casamiro
Rede Koligasaun Agrikultura Timor-Leste ne’ebe kompostu husi toos nain sira, grupu joventude agrikultura, organizasaun sosiedade sivil, Asosiasaun Jornalista Timor Lorosa’e, organizasaun ema ho defisiensia, grupu feto no Alumni Parlamentu Foinsa’e (APFTL), ne’ebé iha interese atu tau matan ba asuntu mudansa klimátika, feto no rai, sustentabilidade fiskál, husu governu atu dezenvolve setór agrikultura no promove ekonomia diversifikadu ne’ebé sustentável no inkluzivu iha Timor-Leste, lansa sentru media, hodi halo obsersa monitoriza debate Orsamentu Jeral Estadu 2024.
Liuhosi Konferensia Imprensa, Porta Voz Rede Koligasaun Agrikultura iha Timor-Leste, Remigia Aleixo X. Belo hateten, Rede Koligasaun ida ne’e konkorda hodi re-ativa no estabelese Sentru Midia iha Sekretáriadu Rede ba Rai iha Farol hodi monitoriza akompaña no halo advokasia ba diskusaun sira kona-ba debate Proposta Orsamentu Jerál Estadu tinan 2024.
Nia deha Sentru ida ne’e sei fasilita espasu ba ema no organizasaun oi – oin, atu fó sira nia hanoin no akompaña prosesu debate sira OJE tinan 2024 nian iha Parlamentu Nasionál. Rede Koligasaun Agrikultura Timor-Leste mós husu ba Parlamentu Nasional no Governu atu halo debate ho kle’an, matenek ho kuidadu hodi konsidera situasaun real ne’ebé agora daudaun Timor-Leste hasoru .
“Rede Koligasaun Agrikultura refere ba proposta OJE tinan 2024 katak despeza estadu ne’ebé la sustentável no la realistiku sei fó risku bo’ot ba sustentabilidade rezerva Fundu Petroliferu no finansas públiku iha futuru bainhira Timor-Leste la iha ona reseita husi kampu mina no gas ne ebé Timor-Leste iha. Alende ne’e , problema seluk hanesan mudansa klimátika no feto no direitu ba rai tenke sai prioridade mós ba ( IX ) governu konstitusional ida ne’e”, dehan, porta voz Remigia liuhosi Konferensia Imprensa iha fundasaun Haburas Farol, kinta 7/12.
Nia salenta, Sentru mídia ne’e sei kontinua realiza konferensia imprensa , programa TV Talk Show, PODCAST ba asuntu importante sira hakerek submisaun ba Parlamentu, fasilita media briefing ba jornalista sira, prepara estatementu konjunta, no halo diskusaun nakloke ho jornalista sira, kona ba análize Proposta Orsamentu Jerál Estado tinan 2024.
Sentru midia ne’e sei funsiona husi inisiu diskusi Proposta OJE tinan 2024 iha fulan Dezembru tinan ne’e no sei kontinua monitoriza Ezekusaun Orsamentu Jerál Estadu ne’ebé hetan aprovasaun husi Parlamentu Nasional no Promulga husi Prezidente Repúblika.