Reportajen Umbelina dos Reis
Iha loron tersa-feira, 9 de janeiru, oras tuku 12:00 udan boot kuaze oras ida iha Kapital Dili, estraga komunidade sira nia uma no sasan iha aldeia Fatuc Francisco, Suku Camea, Postu administrativu Cristu Rei. Kada tinan bainhira udan monu rai aldeia Fatuc Francisco sempre hetan inundasaun tanba laiha bee dalan ka valeta, nune’e komunidade hela iha fatin refere sempre sai vitima bainhira tempu udan.
Komunidade Joselino Pinto (48), ho oan feto rua no mane haat, iha aldeia Fatuc Francisco, konta tuir dezastre natural ne’ebé sira hasoru iha tuku 12:00. Nia dehan, kada tinan bainhira udan ona sira nia fatin sempre banjir tanba bee dalan ki’ik entaun udan boot bee tun hosi foho leten sempre tama ba sira nia uma, mezmu PNDS halo ona valeta maibé valeta ka bee dalan nee la aguenta tanba bee nia korente ka volume sa’e maka’as.
“Ohin udan boot banjir ne’e, bee sa’e estraga hotu sasan uma laran hanesan Kulkas, spring bed haat, mesin fase ropa rua no armáriu rua labarik sira nia ropa no sasan dapur nian i animal hanesan manu aman 8 ne’ebé kesi hela bee lori lakon hotu, fahi oan ida mate fatin la salva tanba bee boot ba da-dauk ona, ita bele dehan sasan uma laran ne’e la aproveita hotu kedas.” Konta Joselino Pinto ba Neon Metin iha nia rezidensia, aldeia Fatuc Francisco, Suku Camea, tersa-feira, 09/01.
Hafoin akontesimentu ne’e, vítima Joselino dehan, orsida kalan fatin deskansa laiha tanba dala ruma bee la maran nalihun iha uma laran de’it maibé ohin Protesaun Sivil salva ona nia fen no bebe nurak lori ba sira nia fatin Kaikoli, oan boot sira orsida kalan balun toba iha viziñu sira nia uma. Nia sente triste tebes, tanba foin akontese dala ida de’it karik sente di’ak oi-tuan maibé kada tinan sempre akontese inundasaun bajir maibé governu mai haree liu de’it, la hadi’a valeta ka bee dalan refere, parte relevante hanesan Protesaun dehan atu hadi’a maibé la hadi’a até a data.
Komunidade refere rekomenda ba nonu governu konstitusional tenki tuun direita haree povu nia moris bainhira udan monu rai, nune’e hadi’a valeta ka bee dalan refere, tanba Na’i-ulun sira bosok povu mak barak ona bainhira tempu udan banjir dehan evakua komunidade sira ne’ebé afeita iha risku nia laran maibé realidade ko’alia de’it. Tanba iha tinan 2011-2012 Sua Exelensia Kay Rala Xanana Gusmão rasik to’o ami nia fatin dehan hadi’a bee dalan maibé até agora la hadi’a, abandona nafatin komunidade Fatuc Francisco bainhira udan kontinua hetan inundasaun.
Sorin seluk Angelita Siqueira Sarmento, (36), ho oan na’in lima (5), konta tuir udan boot bee sa’e no uma laran banjir, bee sae no nalihun uma laran ropa no sasan uma laran bokon hotu maibé la estraga, bai-bain bee nalihun hanesan ne’e sei maran kleur oi-tuan. Mezmu bee nalihun maibé ami hein orsida kalan bee maran tiha oi-tuan ami pasiénsia toba de’it tanba realidade udan mak hanesan ne’e ona.
“Mezmu udan boot uma laran banjir maibé orsida kalan ami pasiénsia tur hein bee maran ami toba nafatin de’it iha uma, sente triste tebes tanba hanoin ba labarik ki’ik sira nia toba fatin ne’e.” Nia espresa ho triste.
Nia rekomenda ba governu katak karik bele haree netik povu ki’ik sira nia moris bainhira iha tempu udan, hadi’a netik bee dalan ka valeta sira ne’e atu to’o tempu udan karik bee tuir nia dalan nune’e povu ki’ik bele moris hakmatek.
Tuir observasaun Neon Metin iha terenu nota katak, tersa-feira (09/01) mais ou menus 02:30 komunidade iha aldeia Fatuc Francisco, Suku Camea, udan estraga komunidade lubuk nia uma, estraga mos sasan barak mak hanesan ropa OB, Jeleira, Televizaun, Komputador, Spring bed no sasan dapur nian, i komunidade balun aproveita mota tuun, sira soe lixu iha mota laran.