Reportajen Filomena da Conceição
Diretór Ezekutivu Forum organizasaun Naun Governamental Timor-Leste (FONGTIL), Valentim da Costa Pinto hateten, FONGTIL hamutuk ho organizasaun rezisténsia religiosu hala’o vizita ba fatin istóriku saudozu Nicolau Lobato nia mate fatin iha Binani, suku Mindelu, Postu Administrativu Turiskai, Munisípiu Manufahi, hodi hametin Nasionalizmu no ba futuru bele konvense Ministériu Turismo atu bele promove fatin refere.
“Diálogu tinan ida ne’e ami iha prosesu tolu ne’ebé ami konvida partisipante sira hodi bele la’o tuir, mak hanesan la’o ain ka napatilas ba fatin istóriku saudozu Nicolau Lobato nia mate, hodi konvida ema hotu-hotu bele haree no rona didiak ita nia sasin moris sira hodi ko’alia buat ruma ba ita hodi sai hanesan buat ida ne’ebé haforsa nafatin ita nia Nasionalismo ne’ebé ita bele konta fila fali ba ita nia oan no beioan sira,” dehan Diretór Ezekutivu FONGTIL, Valentim ba Jornalista sira iha Binani postu Administrativu Turiskai, Munisípiu Manufahi, kinta, 11/01.
Nia esplika, Objetivu husi vizita refere hanesan vizita istóriku ne’ebé mai ho karaterístika hakarak atu haforsa, Nasionalismo hodi ema hotu-hotu bele hatene ba iha futuru bele konvense Ministériu Turizmu ho komérsiu ninian hodi bele promove fatin mindelu sai hanesan fatin sitiu turizmu ninian hodi bele permite ema hotu ba vizita fatin ida refere.
Iha fatin hanesan Diretór Asosiasaun HAK Timor-Leste, Feliciano da Costa Araújo hateten, relasiona ho justisa pasadu HAK ejíze nafatin governu sira atu tau iha konitmentu hodi bele ejíze governu Indonézia atu bele hatudu saudozu Nicolau Lobato nia mate isin.
“Hanesan membru ba iha FONGTIL no Hanesan mos fundadór ne’ebé mak estabele ba iha FONGTIL rasik, entaun HAK haree mos ba justisa pasadu ita presiza tau ida ne’e, ate a data hau hanoin sosiedade Timor laran tomak hatene buka hela no ejize ita nia membru Parlamentu mós ejíze, to’o banhira loos mak governu Indonézia bele rekoñese hodi bele entrega saudozu ninia mate isin, tanba nia bele mate iha ne’e, maibé ate agora ita la hatene ninia paradeiru,” haktuir Diretór HAK
Tanba ne’e, HAK ezije nafatin ba asuntu ida ne’e atu iha konitmentu tanto governu no orgaun soberanu sira hotu bele halo diskusaun ida klean ho governu Indonézia para bele hatudu ba ema hotu-hotu katak mate isin rai iha ne’ebé.
Nia Salienta, Maske ukun aan ona iha 24 anos ona, maibé seidauk hetan nafatin saudozu nia mate isin tanba ne’e rekomenda ba governo atu bele valoriza nafatin saudozu Nia luta hodi bele buka tuir nafatin saudozu nia isin mate.