Reportajen Joselina dos Santos
Sekretária Estadu Formasaun Profisionál no Empregu (SEFOPE), liuhosi Diresaun Nasionál Empregu Exterior (DNEE), realiza seremónia despedida no asina deklarasaun entre familia traballadór SEFOPE kona-ba joven Timoroan na’in 85 sei ba servisu tan iha Australia. Ho ida ne’e SEFOPE husu ba traballadór sira labele sai husi sistema nomos labele halo problema iha ema nia nasaun, tenke kumpri komprimissu ne’ebé iha.
Diretór Jerál SEFOPE, Carlito do Rosário Cabral hatete, objetivu husi atividade ohin ne’e halo despedida ba traballadór foun hamutuk 45 no tuan hamutuk 40 hamutuk feto na’in 19 no mane na’in 66 hamutuk 85 pesoás atu ba servisu iha Australia ne’ebé sei servisu liu ba iha área agrikultura nian.
“Ami hanorin beik-beik ba traballadór sira katak, labele koko sai husi sistema kuandu sira sai husi sistema mak sei prejudika prograna ne’e rasik nomos taka dalan ba kandidatu traballadór sira ne’ebé prepara hela prosesu balun atu ba servisu iha Australia”, dehan, Diretór Jeral Carlito do Rosário Cabral, iha Salaun SEFOPE Caicoli, kinta 18/01.
SEFOPE husu ba traballadór sira labele koko atu sai husi sistema nomos labele halo problema iha ema nia nasaun, tenke kumpri komprimissu ne’ebé ohin sira lee no asina deklarasaun entre familia traballadór no SEFOPE. Karik halai sai husi sistema ita buka servisu hamutuk ho embaixadora iha Australia nomos empregador sira oinsa atu rezolve nomos haruka sira mai tuir kontratu ne’ebé estabele ona.
“Teste ne’ebé Diresaun Nasional Empregu Exterior halo hela prosesu materia teste nian, nomos prepara forma ekipa ba ema ne’ebé halo programa sira ne’e iha ona 80% nun’e sei realiza iha fulan Fevereiru data fiksu sei publika bainhira bainhira preparasaun remata”,
Traballadora Aguida Freitas Da Costa, agradese ba Sefope tanba bele opotunidade ba dala rua no kompañia bele fó fiar ba nia. Nune’e nia pronto kompri juramentu ne’ebé ohin jura no sei halo tuir regulamentu sira. Ne’e duni sujere ba SEFOPE karik tempu tuir mai hakarak hadia tan programa, tanba iha Australia lei ne’ebé la hanesan ho Timor se bele SEFOPE hadia programa ne’ebé lao ona ba servisu iha Australia.
“Ha’u iha planu atu hadia familia uma laran nomos selu alin sira nia eskola nomos iha planu atu halo bu’at ruma iha ami nia munisipiu Viqueque”, nia dehan.