Reportajen David da Costa
Estudantes husi Universidade Nasionál Timor Lorsa’e (UNTL) Hamutuk 25 mill ne’ebé maka la ativu ona iha universidade ka husik sira nian estudu. Tanba ne’e Universidade UNTL sei fó oprtunidade fulan neen, ba estudante sira ne’ebé husi sira nian estudu iha tinan 2000 to’o mai 2024 atu ba fali rejita sira nia naran hodi kontinua sira nia estudu.
Reitór Universidade Nasionál Timor Lorosa’e (UNTL) João Soares Martins, Hateten, Universidade UNTL agora prepara hela dados estudantes sira ne’ebé maka husik hela sira nian estudu iha universidade hahú husi tinan 2000 to’o mai 2024.
“Neste momemtu ami prepara hela dados, ami sei halo faseadamente, husi base dados ne’ebé maka ami iha por volta 25 mill estudantes inativu, sura husi tinan 2000 mai to’o iha 2024,” dehan Reitór UNTL João Soares Martins ba Jornalista sira hafoin hasoru Malu Prezidente Republika José Ramo-Horta iha Palasiu Prezidente Bairo-Pite, Segunda 25/03.
Nia haktuir, maibé universidade UNTL sei fó oprtunidade uluk ba estudantes husi tinan 2000 mai to’o iha 2012 atu ba rejita sira nian naran iha universidade, depois mak kontinua husi tinan 2013 to’o mai 2024. No estudantes hirak ne’ebé la ativu ona iha universidade ne’e agora nian naran kompleitu iha hotu ona no hein atu publika iha media sira no Web Site UNTL nian.
“Mas ami sei hahú uluk husi 2000 to’o 2012, ami fó sira fulan neen tan, semana oin ami sei anusiu formal ida, sira nia lista naran kompleitu iha hotu ona, no ami sei anusia iha web site UNTL nian no bele mós iha media sira iha Timor para bele publika estudante sira nian naran,” nia esplika.
Nune’e míos Reitór Husu ba estudante sira ne’ebé la ativu, karik sei iha vontade atu mai kontinua fali eskola bele mai fali para Universidade rejita fali naran no regularisa sira nia situasaun, atu nune’e sira bele hahú fali sira nia aula ka sira nian estudu.
“Maibé to’o fulan neen maka sira la mai, ami sei hamos sira nian naran husi Sistema no sira sei lakon sira nian status hanesan estudante UNTL,” Tenik nia.
Alende ne’e Reitor UNTL mós ko’alia katak, iha tinan ida ne’e universidade UNTL simu estudantes hamutuk 4.774 maibé estudantes ne’ebé maka mai rejitu iha univesidade ne’e hamutuk 3.532 no 1.242 maka la mai rejitu iha universidade. No dadaun ne’e estudantes foun ne’e aula la’o ona.