Reportajen David da Costa
Reitór Universidade Nasionál Timor Lorasa’e (UNTL), João Soares Martins, Rekoinese katak UNTL menus iha rekursu umanu, tanba ne’e Universidade UNTL iha hanoin, sei haruka tan dosente sira ne’ebé maka idade joven liuliu estudante sira ne’ebé maka iha melores graduandu sira atu bele kontinua tan sira nia eskola.
“Rekursu umanu neinke supesente, ha’u hanoin ita tenke presiza tau atensaun ba professores sira, tanba professores sira barak maka tama ona iha terseira idade, entaun ita tenke prepara investe atu haruka tan dosente sira ne’ebé maka ho idade joven liuliu melores graduandu sira para sira bele kontinua tan sira nia eskola. Atu nune’e, hanesan ami sira ne’e tama ona ba iha terseira idade ba pensaun, entaun ita iha ona kamda ida ne’ebé ita prepara atu bele kontinua lidera nomós kontinua universidade UNTL,” dehan Reitór UNTL João Soares Martins ba Jornalista sira hafoin hasoru Malu Prezidente Republika José Ramo-Horta iha Palasiu Prezidente Bairo-Pite, Segunda 25/03.
Alende ne’e mós nia ko’alia tan, Iha tinan ida ne’e, Universidade UNTL sei fó graduasaun ba estudantes finalista sira hamutuk 1700 ital, no finalista sira naran tama hotu ona mai iha universidade no iha fulan Juliu tinan ne’e sira sei tuir graduasaun.
“Graduasaun sei akontese iha fulan juliu, lista naran graduados husi fakuldade sira tama hotu ona mai iha universidade porvolta 1700 ital maka sei tuir graduasaun. Ha’u hanoin numeru ne’e boot liu kompara ho 1500 ne’ebé maka halo iha tinan kotuk,” nia esplika.
Nune’e mós, nia dehan, tinan ida ne’e Universida propoin ba iha Governu atu aloka Orsamentu Jeral Estadu (OJE) tinan 2024 ne’e iha 24 milloens mai iha UNTL, maibe na realidade orsamentu ne’ebé aloka mai iha UNTL 17 milloensa deit.
“Orsamentu ne’e varedade, ita rekinese katak orasamentu jeral UNTL hetan korta makaas, ami propoin 24 milloens maibé mai hetan de’it 17 milloens, ami tenta bele funsiona ho montante ne’ebé maka iha tanba ne’e maka ami avansa ho prinsifiu ida, iha 2024 ita tenke kesi kabun, ita tenke halo diak. Ita boot sira hatene uluk bainaka sira ba UNTL, ami sosa Aqua fó sira, maibé ba 2024 sira ba ami la fó nein buat ida ba sira, tanba ne’e ami sei destina ba atividade sira ne’ebé maka importante ba estudante sira ninian,” nia hateten.
Tanba ne’e, ohin Prezidente Republika José Ramo-Horta, hateten nia apoiu nia sei koalia ho Primeiru Ministru Kay Rala Xanana Gusmão, atu nune’e bele tau atensaun ba UNTL tanba UNTL uniku universidade Publiku estadu ka governu no povu Timor ninian, entaun tenke investe iha UNTL.
