Reportajen Joanina Casamiro
Fundo das Nações Unidas para a Infância (UNICEF-Sigla Portages) liuhosi Ministériu Edukasaun Juventude no Desportu (MEJD), apoiu Material lona, kalen zinku, pregu, ai kuadradu, pensu hena, no matériál aprendizajen nian ba eskola ensinu baziku sira iha Munisipiu, ne’ebé maka hetan estragus husi anin boot foin lalais ne’e.
Liuhusi apoiu ne’e Reprezentante UNICEF Bilal Durrani hateten katak, dezastre natureza ne’ebe akontese hamosu anin no udan boot, konsege estraga tiha eskola ensinu baziku iha Munisípiu sira, tan ne’e UNICEF apoiu matériál atu responde hodi halo rekuperasaun fila fali.
“Dezastre naturais no situasaun emerjénsia sira seluk bele akontese iha kualker tempu , no bainhira akontese iha eskola sira , ita idak – idak tenke preparadu atu responde ho seguru no efeitivu, udan no anin bo’ot ne’ebé akontese foin lalais halo estragus ba eskola Ensinu Báziku hamutuk sanulu resin lima 15 iha munisipiu hitu 7 Aileu , Ainaro , Bobonaro , Covalima , Ermera , Lautem no Viqueque,” hateten Bilal Durrani iha Salaun Konferensia Ministeriu Edukasaun iha Vila Verde Dili, Sexta 6/01.
Nia haktuir presiza asegura no resposta ba rekoperasaun tuir tempu atu nune’e situasaun emerjénsia la fó impaktu ba labarik sira lakon aprendizajen ba tempu naruk.
“Matériál ensinu no aprendizajen husi UNICEF ba MEJD ba prosesu rekoperasaun iha eskola sanulu resin lima 15, Matériál hanesan lona, kalen zinku, pregu, ai kuadradu, pensu hena, no matériál aprendizajen nian, espera matériál emrjénsia sira ne’e sei suporta eskola sira, hodi bele aselera prosesu rekuperasaun nian,” nia esplika.
Nune’e mós iha tinan ida-ne’e UNICEF mós sei suporta Ministeriu, hodi sosa matérial rezerva ba situasaun emerjénsia ne’ebé bele distribui no uza imediatamente bainhira mosu situasaun emerjénsia iha futuru.
Tuir planu UNICEF mós sei fó apoiu ba MEJD, hodi halo esforsu opsaun polítika, atu responde ba emerjénsia iha futuru iha setór edukasaun, ba jestaun risku dezastre nian, kolesaun dadus kompleta ona no pasu tuir mak halo sorumutu validasaun nian.
Alende ne’e mós UNICEF iha komitmentu atu asegura direitu ba labarik, no ema ho defisiensia sira bele realiza no respeitu liuhusi UNICEF nia intervensaun programatiku sira ho kolaborasaun no koordenasaun besik liutan ho liña ministériu no parseiru sira seluk.
