Reportajen Silvino Freitas
Market Development Facility (MDF) ho Asosiasaun nain ba Hotel Timor Lorosa’e (Hotel Owners Timor Lorosa’e HOTL) realiza kooperasaun hodi promove turizmu iha Timor Leste, ho kampaña merkadoria iha plataforma mídia-sosiál, liuhusi video no imajen hodi promove destinu turizmu Timor Leste nian.
Tuir Xefe Ezekutivu East Timor Trading, Samitha Aluwihare katak, atu hala’o asaun ida hodi promove distinasaun turizmu nian iha Timor Leste tanba Timor Leste iha riku-soin barak iha area marina no kultura nian.
“Promosaun ba destinasaun la’ós iha munisípiu ida de’it maibé iha teritóriu nasionál tomak, ne’ebé iha kampana destinasaun marketin destinasaun ne’e ami sei halo atende ida iha festivál Darwin nian, hodi promove di’ak liu tan kona-ba Timor Leste nomós husi akordu ida ne’e mós ami sei hala’o kampaña ida iha mídia-sosiál husi konteúdu di’ak ba turizmu sira iha Timor Leste” dehan Samitha hafoin asina akordu iha salaun MDF Dili, (02/06).
Fatin hanesan Country Director MDF Drew Johnson hateten, husi parseria ne’e bele promove di’ak liu tan nasaun promove turizmu marina, kultura no foho sira ne’ebé sai distinasaun ba turizmu iha Timor Leste, nune’e ita bele hadi’a ekonomia iha seitór turizmu nian, tanba iha Timor Leste iha produtu ne’ebé uniku hanesan mós turizmu relijiozu mós parte ida di’ak ba seitór turizmu nian, hodi bele atrai visitór sira husi estranjeiru mai Timor Leste.
“Hala’o estratejia marketing ba turizmu nian, asiste esposizaun sira turizmu iha nasaun seluk hodi promove turizmu iha Timor Leste no hamutuk ho operadór lokál sira lansa turizmu komunitária sira” hakotu Drew Johnson.
Entretantu programa promove distinasaun turizmu refere hetan apoiu finansiamentu husi governu Australia, nune’e bele promove dezenvolvimentu ekonomia sustentavel inklui mós seitór agrikultura iha Timor Leste.
