Reportajen Silvino Freitas
Komunidade no joven intelektuál husi suku Abo Postu Quelicai Munisípiu Baucau, kompostu husi aldeia 5 lamenta ho desizaun Ministeriu Administrasaun Estatál (MAE) Miguel de Carvalho ne’ebé la aprova sira nia proposta atu harii suku foun Abo-Matebian nia, nune’e sira desizaun Ministru ofende militante FRETILIN iha Quelicai ne’ebé fó votus ba partidu FRETILIN hodi nia sai Ministru.
Tuir portavoz Joao Pinto, populasaun sira ne’ebé hela iha foho matebian hun, kompostu husi aldeia 5 Lir, Cairedo, Abo Matebian no Daemena husi Suku Abo, inklui Aldeia Osoliro husi Suku Lelalai nu’udar aldeia izoladu sira ne‘ebé dezde tempu kolonizmu Portugés nian to’o mai Timor Leste ukun rasik a’an, tanba la hetan atendimentu públiku tuir terminolojia efisénsia no efikas ne’ebé governu tau nu‘udar filozofia hodi motiva makina estadu nian.
“Fator prinsipál ne’ebé mak ami populasaun la hetan atendimentu públiku, mak distánsia asesu ba sede suku ne’ebé dook tebes, hanesan be sede suku Abo kuaze kilo metru 5 to’o 6, no ba sede suku Lelalai kuaze kilo metru 10 to’o 14, nune’e mós fator prinsipál ida mak ami nian teritoriu ne’ebé partense iha foho matebian hun hanesan enklave ida husi suku Abo no Lelalai, tanba ami hakat liu busi baliza suku Laisorulai de Cima, Laisorulai de Baixo no Bualale mak foin bele trata dokumentu ruma” dehan portavoz João iha Bidau toko-baru Dili, (02/06).
Nune’e sira mós lamenta tebes ba desizaun Ministru Administrasaun Estatál, ne’ebé rekoñese de’it suku foun 10 mak hanesan ASSUI-LAU, KOLIATE LETEN, POETETE LODUDU, no POETETE VILA ne’ebé nu’udar ministro nia munisípiu rasik, no Suku foun hanesan CAIBADA MAKASA’E, BUILAI no UERUMATA husi Munisipiu Baucau, inklui MACADIQUE-UAITAME, MACADIQUE DE CIMA NO MACADIQUE DE BAIXO husi Munisipiu Viqueque, sira mós lamenta no konsidera Ministru nian desizaun ne’e iha tendénsia ne’ebé nakonu ho rasionalizmu tanba ita boot nian mandatu ukun ne’e aprova kedan Suku 4 no postu administrativu ida iha munisípiu Ermera kompara ho Munisipiu sira seluk ne’ebé mak hato’o proposta hodi hari’i suku foun no Postu Administrativu foun sira.
Fatin hanesan joven intelektuál Faustino Soares hateten, sira lakon direitu atu harii suku foun ne’e la’ós iha kritériu regular, maibé lakon iha desizaun polítika, tanba Ministru ne’ebé asume kna’ar mai husi partido poltika nomós tuir teste meritu sai Ministru maibé ho nomeasaun polítika nian, maskí ministro Miguel mai husi partido revolusionario tuir loloos nia hatene, durante ne’e nia la haree ba rezultadu viabilidade ne’ebé iha nune’e sira konsidera katak ministro laiha kapasidade ne’ebé lidera instituisaun refere, maibé presiza haree ba rezultadu estudu viabilidade.
“Estudu ne’e viabel tiha maibé deside oin seluk fali ne’e hatudu katak laiha kapasidade ida seluk mós mai haree katak desizaun ida ne’e ofende ba militante sira ne’ebé durante fo votus ba partido FRETILIN ne’ebé nia sai nuudar ministru, nia mai husi prosesu eleisaun mak nia tuur iha ne’ebá tanba ne’e desizaun ne’ebé nia halo ba militante sira iha Quelicai, tanba Quelicai nia proposta tolu ne’ebé mai hato’o ba iha nia halo hotu estudu maibé laiha ida maka liu” dehan Faustino liuhusi konferénsia imprensa.
