Reportajen Silvino Freitas
Prezidente Repúblika Jose Ramos-Horta fo kondekorasaun ema 102 ho gau 3 husi nasional no internasional tanba ema hirak ne’e fo ona kontribuisaun ba luta no ho siensia ne’ebe moderniza dezenvolvimentu Timor-Leste nian.
PR Horta dehan, prezidente ho governu buka onra husi elementu ne’ebe husi personalidade husi elementu nasional no internasional husi ema simples liu no balun ne’ebe ho pozisaun boot, nunee husi ema iha kraik to’o leten ne’ebe kontribui ba estadu ho nasaun hotu hotu husi kiik too boot tanba sira iha leten deit laiha kbiit halo governasaun.
“Hanesan hali ida ida husi nia abut too nia mahon ne’e diak tebes, tanba ne’e sempre buka sira ne’ebe simples liu servisu iha ne’e halo limpeza no seguransa sivil” dehan PR Horta iha ambitu kondekorasaun iha salaun Xina palasiu prezidente aitarak-laran Dili, (27/11).
Nia dehan tan, sira balun servisu iha instituisaun estadu hanesan mediku too saneamentu sira nune’e mos elementu sira ne’ebe hahu husi ukun an no timoroan sira ne’ebe ho estudu boot ba modernizasaun dezenvolvimentu rai ida ne’e ho estudu iha mestradu no dezenvolvimentu, tanba matenek iha doutoramentu ne’ebe fo matenek inovasaun ba rai ida ne’e nune’e mos universidade sira husi indonesia hanesan Gajah Mada no ITBN sira ne’ebe produz rekursu umanu timoroan nian.
“Buat ne’ebe hau kontente ita nia estadu ne’e la haluha ema sira ne’ebe apoia ita no prosesu rekonesementu ne’e hahu iha 2009 governu rekonese veteranu sira lei ne’ebe parlamentu halo nee rekonese hotu hotu, maun boot Xanana hateten ema ida rekoñese loron ida ita rekoñese” konklui PR Horta.
Nune’e kondekorante ne’ebe kondekora husi Prezidente Repúblika José Ramos-Horta hamutuk ema 102 ho grau sira maka grau kolar ema nain 21, grau medalla orden Timor-Leste 48, insigna ordem Timor-Leste 27, grau medalla de meritu 5, ema hirak ne’ebé fo ona sira nia kontribuisaun liuhusi luta inklui mos iha prosesu dezenvolvimentu.
