Reportajen Zevonia Vieira
Governu Japaun ho Timor-Leste selebra finalizasaun postu saude iha suku Uaimori munisipiu Viqueque iha loron 1 Junu 2023. Iha seremonia inagurasaun ne’ebe Embaixador Japaun ba Timor- Leste, Tetsuya KIMURA hateten importante ba Governu Japaun katak, ema hotu iha mundu tomak bele hala’o moris ne’ebé seguru no protejidu. Asesu ba atendimentu saude baziku nu’udar entre elementu sira ne’ebé importante tebes hodi alkansa objetivu ida ne’e.
Liuhusi komunikadu imprensa ne’ebe Neon Metin asesu, Embaixador KIMURA dehan Postu saude mak sentru ida ne’ebe fornese atendimentu saude, no ajuda komunidade sira ida-idak hodi halao moris ne’ebe saudavel. Tanba ne’e, Governu Japaun apoiu ona konstrusoens postu saude iha munisipiu sira, mesmu fatin sira ne’e susar atu asesu. Iha munisipiu Viqueque, ami apoiu ona postu saude rua ida iha suku Uaimori no ida seluk iha suku Uabubo.
Nia afirma katak desde lansamentu projetu dahuluk iha tinan 2000, projetu hamutuk 136 (atus ida tolu nulu resin neen) mak implementa ona liu husi eskema GGP iha Munisipiu 14 (sanulu resin haat) iha teritoriu Timor-Leste tomak. Projetu sira ne’e liu-liu fornese asisténsia ba infraestrutura komunitária, hodi responde ba komunidade sira nia nesesidade báziku oioin iha nivel baze.
Fasilidade saude ba 15 ne’ebe harii ou reabilita ne’e, hetan spoiu fundu husi Governu Japaun liu husi eskema ida ho naran programa Fundu Asistensia ba Projetu Komunitariu e Seguransa Umana (GGP) ne’ebé lansa iha Timor-Leste iha tinan 2000.
Postu saúde foun ne’e inklui sala konsultasaun, sala de partu, laboratóriu, hariis-fatin no farmásia ne’ebé sei fornese asesu di’ak liu ba atendimentu saúde ba ema hamutuk na’in 2,275 (rihun rua, atus rua hitu-nulu resin lima) iha suku Uaimori no sei ajuda komunidade sira hala’o moris ne’ebé saudavel liu. Governu Japaun fornese asistensia fundu ho montante $92,556 (rihun sia-nulu resin rua, atus lima lima-nulu resin neen) ba Forum Tau Matan, ONG lokál ida ne’ebé mak implementa projetu nee.
Iha loron inagurasaun ne’e marka prezensa mos husi Ministra Saude, Dra. Odete Freitas Belo no Administrador Munisipiu Viqueque, Januario Soares, inklui profissionais de saúde iha postu saude no povu sira husi komunidade refere, no konvidadus sira seluk.
