Home Saude Autoridade RAEOA Preparadu Konaba Medidas Prevensaun Corona Virus

Autoridade RAEOA Preparadu Konaba Medidas Prevensaun Corona Virus

177
0
Ekipa Saude iha RAEOA halo hela konsulta ba komunidade sira. [Foto: Midia ZEESMTL | 30.03.2020]

Kontributor Mídia RAEOA – ZEESMTL

Hodi responde  pandemia  vírus Corona ne’ebe ataka ona  paises 198 inklui  Timor Leste, Prezidente Autoridade RAEOA – ZEESM Timor-Leste, Jose Luís Guterres hamutuk ho Ekipa Konjunta Prevensaun COVID-19  RAEOA  identifka ona fatin hirak ne’ebe sei sai fatin akoilamentu ba Oé-Cusse oan sira ne’ebe oras ne’e halao hela sira nia atividades iha Indonesia wainhira fila mai rai enklave.

Esforsu hirak ne’e nu’udar afirmasaun Autoridade RAEOA-ZEESM hodi responde ba propagasaun  vírus corona haktuir husi politika  VIII Governu Konstitusional inklui mos alerta husi  Organizasaun Mundial  Saúde (OMS) katak pendemia ne’e  presiza  “Asoens Agresivas” husi entidades hotu.

Autoridade RAEOA-ZEESM desidi tiha ona fatin lima(5)  ne’ebe sei sai fatin akoilamentu mak Hotel Lifau, Rezidensía Fulolo,  Ótel Cinco Estrela,  Klinika Kurasaun no  Salaun Alfándega, Palaban.

“Autóridade RAEOA sei responsabiliza ba alozamentu hotu inklui fornese aí-han no fornese pulsa atu sira bele kontaktu ba sira-nia família. Autóridade mos responde ba nesesidades seluk ne’ebe presiza durante períodu akoilamentu”. Hateten Prezidente Autoridade RAEOA – ZEESM, Jose Luís Guterres depois hare preparasaun Ekipa Konjunta Prevensaun COVID-19 loron 27 Marsu 2020.

Ekipa K­onjunta Prevensaun COVID-19 RAEOA  prepara mos  etapas antesipada konaba requisitu tomak wainhira povu Atoni hakat ain tama Oé-Cusse liuhusi fronteira Sakato no Oe-Silo inklui prosesu evakuasaun husi Oé-Cusse mai Dili wainhira iha  pesoal balun  identifika pozitivu  surtu Covid-19 hodi bele transforma mai Dili ho  Aviaun MAF (Mission Aviation Fellowship). MAF  nu’udar organizasaun  Kristaun Internasional, hodi  apoia serbisu umanitáriu ho  parseiru sira  hela iha area remota ne’ebe susar atu hetan asesu  hodi fasilita ho dalan ne’ebe mais fásil, rápidu no seguru liuhusi dalan fornese suporta  aviaun modelu kiik ba area hirak ne’ebe presiza tulun husi MAF..

Oras ne’e Ekipa Konjunta Prevensaun COVID-19 RAEOA,  kuntinua halo sosializasaun ba povu Oé-Cusse konaba influênsia husi surtu corona virus no asoens preventivas ne’ebe presiza  obedese nu’udar regras ba níveis  sosiedade hotu.

Iha sorin seluk hodi antesipa konaba nesesidade bázika ba povu Oé-Cusse hodi responde konaba deklarasaun Estadu Emerjensia durante fulan ida hahuu husi 28 Marsu – 26 Abril 2020, Prezidente Autoridade RAEOA – ZEESM, Jose Luís Guterres iha loron 27 Marsu 2020 simu mos delegasaun  emprezariu Oé-Cusse oan  sira iha edifisiu RAEOA. Sorumutu ne’e hodi rona    opiniõens husi emprezarius Oé-Cusse oan sira konaba  kapasidade emprezarius   hodi kuntinua fornese nesesidade bazika ba Oé-Cusse wainhira implementasaun Estadu emerjensia hahuu,  inklui  medidas hirak ne’ebe Autoridade RAEOA sei halo   wainhira povu Oé-Cusse  infrenta menus aihan liu liu fos no nesesidade bázika sira seluk.

LEAVE A REPLY

Please enter your comment!
Please enter your name here