Home Notisia Dr Rui Araujo: Uza Lei Deit Sei La Rezolve Kazu Soe Bebe

Dr Rui Araujo: Uza Lei Deit Sei La Rezolve Kazu Soe Bebe

436
0
Dr Rui Araujo halo aprezentasaun kona ba kaze soe bebe (Foto: Ato Lekinawa Costa

Fenomena soe bebe kontinua sai asuntu importante iha diskusaun sosiedade nian. Eis-Premeiru Ministru, Dr Rui Araujo, hatete katak uza deit lei sei la rezolve kazu soe bebe. Nia husu atu rezolve liu hosi hamenus unwanted pregnancyka isin rua mak la hakarak. Lia hirak ne’e nia hato’o iha hosi diskusaun meja redonda ohin (14/08) mak organiza hosi CODIVA Hatutan ho BuiMau, iha Salaun CNE, Dili.

Eis-Premeiru Ministru, Dr Rui Araujo esplika katak estudu sira mak halo tiha ona iha Eropa ne’eba hatudu katak feto sira ne’ebe komete kazu infantisida (oho oan tinan 1 ba kraik) no neonatasida (oho oan ne’ebe foin moris durante oras 24 nia laran) akontese barak liu ba inan sira ho idade 25 ba kraik.

Nia esplika liután katak, “kazu hanesan ne’e akontese tanba komunikasaun iha uma laran la diak, oan feto isin rua la fo hatene ba inan-aman, no inan-aman mos la halo komunikasaun ho oan mak hetan problema ne’e. Idade 25 ba kraik ne’e psikolojikamente seidauk iha maturidade no barak sira ne’ebe la kaben mak tama ba kazu sira hanesan ne’e. Sira ne’ebe hetan kazu hanesan ne’e dala barak mos la konsulta iha doutor médiku.”

Dr Rui Araujo mos dehan métodu ne’ebe sira uza hodi oho bebe dala barak halo liu hosi hanehan to’o mate, buti mate, ka hatama ba bee laran. Motivu importa liu, tuir estudu sira hatete katak, razaun ne’e tanba moe no stigma sosial iha komunidade.

Estudante balun mos husu atu halo reforma ba sistema judisiáriu hodi nune’e bele hodi nune’e bele hapara aktu soe bebe. Hatan ba perguntas estudante sira nian, Dr Rui Araujo dehan, “uza lei deit sei la rezolve. Meius atu hamenus kazu hanesan ne’e mak tenke prevene isin ne’ebe la hakarak (unwanted pregnancy). Nia propoin atu halo edukasaun sexual forte liután iha eskola sira. Joven sira tenke hatene oinsá halo relasaun sexual ne’ebe la halo feto hetan isin rua.

Diskusaun meja redonda ho tema, “Mai Ita Koalia Kona-ba Komitmentu Ita Hotu Nian Inklui Governo no Sociedade Civil Hodi Halo Prevensaun ba Kazu Abandona Bebe”, ne’e hetan aprezentasaun hosi membru governo, Mericio Akara, Eis-Primeiru Ministru, Dr Rui Araujo, Reprezentante Sociedade Civil, Laura CODIVA, no hosi Ministeriu Saude nian. Maioria partisipantes ba diskusaun ne’e mak estudante universidade sira (UNPAZ, UNTL) no mos hosi estudantes sekundária sira.

LEAVE A REPLY

Please enter your comment!
Please enter your name here