Home Notisia Laura: Kazu Soe Bebe 25 ona, Lei Fo Todan Deit ba Inan

Laura: Kazu Soe Bebe 25 ona, Lei Fo Todan Deit ba Inan

645
0
Diskusaun Meja Redonda ba Kazu Soe Bebe (Foto: Ato Lekinawa Costa)

Aprezentador ne’ebe mos nudar membru BuiMau, Laura Afonso de Jesus, esplika iha ninia intervensaun ba meja redonda ho tema, “Mai Ita Koalia Kona-ba Komitmentu Ita Hotu Nian Inklui Governo no Sociedade Civil Hodi Halo Prevensaun ba Kazu Abandona Bebe”, katak lei ne’ebe uza hodi kondena inan sira mak soe bebe fo todan deit ba feto. Lia hirak ne’e, Laura hato’o iha Salaun CNE, 14/08, iha Dili.

Oras ne’e dadaun iha ona kazu soe bebe 25. Iha kazu hirak ne’e hotu inan ka feto mak sempre hetan sala ka hetan publik nia kondenasaun.

Laura mos esplika katak agora dadaun iha ona inan nain 5 mak iha prizaun preventiva ho kazu mak hanesan. Maibe Laura la haksolok ho artigu ne’ebe tribunal uza hodi kondena inan ne’ebe soe bebe.

“Lei ne’ebe tribunal uza hodi kondena inan mak soe bebe fo todan deit ba feto no la haree ba mane no aspeitu seluk mak halo kazu soe bebe akontese”, Laura esplika.

Laura esplika ida ne’e hodi refere ba artigu 142 Kodigu Penal ne’e hatete katak, “A mãe que matar o filho durante o parto ou logo após este e ainda sob a sua influência perturbadora é punida com pena de prisão de 3 a 10 anos.“

“Kazu mak foin dadaun akontese, soe bebe mate iha Taibessi, ne’e diskonfia nudar kazu incestu. Inan ka joven feto ne’e hetan violasaun sexual hosi ninia aman rasik”, partisipante diskusaun nian ida hatete iha ninia intervensaun.

Iha diskusaun nia laran estudantes no organizasaun sosiedade civil sira husu atu estadu tenke responsabiliza ba asuntu ne’e. Sira barak halo intervensaun husu atu labele fo sala deit ba inan sira ka feto sira.

Diskusaun meja redonda ne’e hetan aprezentasaun hosi membru governo, Mericio Akara, Eis-Primeiru Ministru, Dr Rui Araujo, Reprezentante Sociedade Civil, Laura hodi BuiMau, no hosi Ministeriu Saude nian. Maioria partisipantes ba diskusaun ne’e mak estudante universidade sira (UNPAZ, UNTL) no mos hosi estudantes sekundária sira.

 

 

LEAVE A REPLY

Please enter your comment!
Please enter your name here