Home Notisia Tinan 20 Livre Hosi Indonesia, 87.4% Labarik Hetan Violensia, 72% Ema Defisiensia...

Tinan 20 Livre Hosi Indonesia, 87.4% Labarik Hetan Violensia, 72% Ema Defisiensia Nunka Eskola

159
0
Labarik iha Pasifik (Foto: The Guardian)

Fulan Agustu nia laran sei nakonu ho festa komemorasaun loron konsulta popular nian ba Timor-Leste. Loron konsulta popular mak loron ba povo Timor-Leste halo nia desizaun atu hases an hosi Indonesia no harii nia estadu rasik. Estadu iha ona ho ninia governasaun rasik ka ukun rasik durante tinan 17, no no desizaun povo nian ba ukun rasik an halo tinan 20 ba iha tinan ida ne’e.

Maski nune’e situasaun moris labarik sira nian la muda barak, labarik sira kontinua hasoru violénsia iha uma no sira ne’ebe defisiénsia la hetan mudansa. Relatoriu hosi ONG Internasional 4 (Save the Children, Child Fund, Plan International, no World Vision) relata katak 87.4% labarik sira hetan violénsia iha uma, 72% hatudu katak ema ho defisiénsia nunka atende eskola.

Bainhira koalia ho, Mariana dos Santos, husu kona ba nia situasaun moris iha uma nia konta katak nia familia moris iha foho no moris ho vida agrikultura. Hanesan bin bot iha uma iha exijensia bo’ot nia atu tulun nia inan-aman. Bainhira husu kona ba kastigu ruma mak nia hetan karik nia halo tuir saida mak nia inan-aman haruka, Mariana hatan katak nia sempre hetan kastigu.

“Dala barak hau hetan basa, dada tilun, ka baku ho aisanak bainhira la halo tuir saida mak ama ka apa haruka”, Mariana konta tuir.

Husu kona ba nia alin sira, karik Mariana mos halo hanesan ba nia alin sira? Mariana hatan katak nia mos halo hanesan bainhira nia alin sira la halo tuir ninia hakarak.

Violensia bainhira pratika ona lor-loron susar atu hases hosi familia. Relatoriu ne’e mos dehan katak 30% labarik feto iha Timor-Leste hetan violénsia iha uma laran.

Struturalmente violénsia akontese iha nivel estadu nian hodi la fornese oportunidade hanesan ba nia sidadaun sira. Ema ho defisiénsia dala barak nunka hetan apoio no oportunidade atu hadiak sira nia moris.

Diretur Asosiasaun Ema ho Defisiensia Timor-Leste (ADTL), Cesario da Silva, expresa nia hanoin relasiona ho faktus ne’e relatóriu ne’e hatudu.

“Dadus sensus hatudu katak númeru ema ho defisiénsia la eskola hamutuk 25 Mil. Problema hanesan ne’e akontese dala barak ba ema ho defisiénsia matan, tilun no intelektuál. Sira susar atu asesu ba eskola tanba la iha manorin no asisténsia, no mos fasilidade ba sira atu aprende iha eskola”, Cesario esplika.

Bainhira husu kona ba politik governo nian hodi fo solusaun, Cesario hatan dehan seidauk iha polítika mak responde ba situasaun ne’e.

“Ministeriu Edukasaun Juventude no Desportu nia intervensaun liu hosi polítika nasionál inkluzivu seidauk responde ba situasaun ne’e”, Cesario aumenta.

Governo Timor-Leste rasik to’o agora seidauk iha programa sistematizadu ida hodi hatan ba problema violénsia hasoru labarik no mos ba labarik sira ho defisiénsia. Orsamentu Geral Estadu 2019 ba fasilidade edukasaun 0.3 Milioens deit, no ba fasilidade saúde 1.1 Milioens deit, kompara ho orsamentu ba estrada ho ponte sira hamutu 236.1 Milioens.

Relatorio ne’e mos hatete katak osan mak gasta ona hosi governo Australia ba programa sira hodi hapara violénsia hasoru labarik hamutu 1.1 Miliaun ka 0.1 pursentu hosi total tulun governo Australia nian ba pasifik iha 2017.

Relatoriu kompletu ho titlu Unseen, Unsafe, Underinvestment in Ending Violence Against Children in the Pacific and Timor-Leste, publika iha fulan Julho 2019.

 

LEAVE A REPLY

Please enter your comment!
Please enter your name here