Home Analisa Soe Bebe: Liberal Kapitalistiku Funan Buras iha Timor

Soe Bebe: Liberal Kapitalistiku Funan Buras iha Timor

1413
0
Hakerek Nain, Fernando Ximenes

By Fernando Ximenes

Ensaiu badak hakerek husi Ato Lekinawa, konaba soe bebe iha Neon Metinhatudu oinsa, Foucault nia biopolitics/biopowerfunsiona iha ne’e. Ezijensia ba autoridade hodi governa isin-lolon, siguransa no moris ema nian buras ba bebeik.  Husi nee, hothotu namnaba bolu dehan ne’e se nia responsabilidade? Estadu ga, igreja ga, NGO ga, familia ga, etc  – pergunta nee mak babain hahoris biopolitika. Hahoris no haluan knaar lulik estadu nian hodi regulariza no kontrola sosiedade bazeia ba nesesidade no demanda foun, entre ida mak soe bebe.

Kuaze kritika neebe mosu ba kazu refere mesak reaksionariu ‘liras los/right wing’ nian deit, no aat liu mak moralista ho rasionalidade tekno-sientifiku husi liberal sira nian neebe babain dehan, tenki fahe condom, edukasaun sexual sedu etc.

Fo kondom ho edukasaun seksual, laos pratika neutral, no ida nee mak rejime etikal husi pragmatiku liberal utilitarianismu ala Oeste sira, malae modernu enlightenmentsira. Nee tendensia kultura global ho baze konsumerismu. Kasa hahan karun no gostu, tiding malu arbiru, sosa kareta barak ka mindlesshedonismu sira nee hotu merkadu mak regula no ema nia gostu-kanten kanaliza ona husi pipa merkadu liberal kapitalista. Katak atu furak tenki uza make-up, ba gymno hatais ropa Gucci etc.

Fila fali ba bebe. Kazu soe bebe, liberal babain ho sira nia kultura kritika babain mak ‘metodu dun-malu’. La feto mak los, entaun mane mak sala, maibe kuaze mane aat hela deit. Gosta kritika ba ema nia hahalok, duke haree ne’e nudar forsa ida dudu husi neon-konsiensia total ida, husi sistema ukun/poder dominante ida hanesan rejime merkadu liberal.

Internet neebe inisiu uza husi militar, agora uza mos ba sivil-merkadu, halo video porno namkari lemo-lemo, – trend hatais ropa iha Milan, iha Dili mos bele iha kedas. Husi ne’e, liberal sira hanoin katak sira nia karater, ema nia karater nee, ida-idak mak determina rasik – hanesan babain liberal dehan autonomia, be your self, its my bodyetc. Ne’e paradoks no kultura taka-an ala Oeste nian. Dehan diversidade, maibe sira nia opiniaun mesak hanesan deit, homogenous tantanan deit. Husi nee, bele dehan katak, kritika liberal neebe NGO, ativista-pseudo sira iha Dili babain kritika ba problema sosial bazeia ba karater ema ida-idak nee, mangame mak barak.

O moris lemo-lemo iha facebook, tama google haree video porno, ransu livre – dudu husi rejime merkadu kapitalismu, halo ema ida-idak revolta hasoru autoridade tradisional. Ema fuma sigaru kroniku ona iha mundu, no liberal nia solusaun mak tau imajem ema moras kankru iha sigaru nia masu. Ema sex arbiru tun sae, dehan fo kondom. Ne’e kultura ida hodi lejitima sex ba ema se deit – atu labarik ga, klosan ga, ferik-katuas ga, bainhira uza comdom nee naran deit. Ikus mai, lejitima pratika at, maibe nega katak nee at.

Ideia liberal sira nee, hanesan babain temi, atu halo rasionalizasaun iha moris maibe sai irasional liu tan. Dehan fo comdom, fo edukasaun seksual atu labarik kiik hatene ona kona-ba perigu sex no kuida sira-an, liuliu ses husi seksual predator sira. Ida ne’e hanesan kedas o hanorin funsionariu lae ukun-nain kona-ba hadook-an husi korupsaun. Hanorin hodi hasees buan-manas nee maibe, buan-manas nee hetan protesaun no hatutan/sustenta husi kultura kapitalismu. Funsionariu ida iha hanoin atu halo korupsaun tanba, nia vizinu iha kareta hat-lima. Ukun-nain ida iha tendensia hodi naok, bainhira nia iha liberdade demais. Hahalok husi gostu privadu neebe kapitalismu prezerva nee halao daudaun asaltu ba moris publiku nian.

Liberal, nia misaun la dok husi misionariu uluk: sivilizasaun. Lahanesan mak uluk relijiaun agora umanismu sekular, ezemplu mak igualdade jeneru, edukasaun seksual blablabla. Liberal nia misaun mak halo ema kiak sai disiplina, halo ema kiak labele soe foer arbiru, halo ema kiak labele soe bebe arbiru, maibe tolera sistema neebe produs kiak, produs indisiplinariu, no produs kultura neebe ema atu hetan bebe mos lakoi – prefere sex arbiru duke oan arbiru. Hakribi no hili mak murak material mundu nian hanesan tau iha spanduk ida hamriik iha igreja Balide oin.

Dalawain, uluk, butamak ida atu fo oan ema nia-oan feto mos sei hanoin barak. Sintu metin ona ga lae? – Katuas sira tenki hatene no koalia lia lai. Kolega milenial agora halimar mak hakat alias revolta tiha autoridade familia, autoridade tradisional. Husi ne’e ‘lere dalan’ fali ga, ‘bee-manas aitukan’ too ‘barlaque’ fali mos taka-matan hotu – tanba liberal dehan nee viola liberdade atu ‘hili’ ema ida-idak nia; kauza violensia domestika.

Modernismu halo dezintegrasaun sosial dunik. Kbiit tradisional lakon no merkadu mak determina o atu kaben ho se. O bele mutuk maibe osan barak, o bele kaben ho agaja ran-midar ho isin-diak ida (hanoin kona ona emprezariu balun iha Dili laran?). Ferik balun osan barak, bele selu labarik-kiik tinan 15 ida hodi repres nia kanten sexual.

Katuas balun ho nia poder ekonomiku, fen husik iha uma, hisik no hakiak sate-oan sira iha liur namnaba. Klosan ida servisu laiha, tidin nia doben isin-rua tiha. Katuas akumula riku no labarik-oan tek mos nia bele fo osan hodi taka-ibun, lae haruka soe bebe tanba osan mak koalia. Klosan ida servisu laiha, osan laiha, osan uza ba pulsa deit araska sa tan ba halo nia lia, fo han nia fen-oan, seidauk tan nia banin nainrua.

Ida nee nudar kondisaun dezigualdade laos deit entre feto ho mane, maibe entre katuas riku-matak no klosan kiak rabat-rai neebe liberal sira ignora bainhira kazu soe bebe mosu. No dezigualdade nee mosu husi kapitalismu liberal, no liberal sira sei nafatin preokupa liu mak diversidade taka-an sira nee duke dezigualdade ekonomia, no preokupa liu mak atu halo ema-kiak ho ema-riku tenki iha disiplina hanesan. Gosta mak dun mane maibe la haree mane nia pozisaun iha realidade luan. Paradoks no hipokratika!

Kazu seluk tan neebe bele loke oinsa tendensia liberal mosu iha Timor. Hanesan kedas sistema kapitalismu nee rasik. Iha sosialismu dehan “matak ida-idak nian, maibe tasak ita hotu” – maibe kapitalismu  fali sa “gostu ema ida-idak nian, too aat ona ita hotu nian”. Empreza sira akumula riku, no halo lakuna iha sosio-ekonomia sosiedade nian; empreza sira akumula kapital, sira nia makina ekonomia ka industria(tantu manufaktura, teknolojia) kria ona destruisaun ambiente neebe bele lori katastrofiku ekolojiku. Aat ona mak husu ba ema hotuhotu tenki sai funu-nain foun hodi liberta planeta – ita hothotu tenki sai enterpreneur alias hatan ba problema boot nee ho reaksionariu hanesan hili foer iha tasi-ibun, recycle, sai vegan, sai organisista, etc. Empreza mak han tiha nan, sikat tan tiha ruin, fila ita mak ba fase bikan foer.

Hanesan kedas soe bebe ne’e, liberal hamosu kultura individualista, privatizasaun moris no riku, riku nee luta individual no halo sex ka hola malu nee nudar pratika individu nian. Husi nee, familia/katuas-sira labele impoen sira nia autoridade. Too bebe moris namlekar ona, publiku tenki hatene hotu. Hotu dun ba ferik-katuas mak la hanorin, maibe merkadu mak la hanorin karik diak. Midar imi rua mak horuk, moruk publiku nia hotu.

Kondisaun estabel, dezenvolvimentu ekonomia kapitalismu halo teki ho toke isin no oin furak deit. Produsaun ba surplus negativu sae, tan surplus husi itcha ho itchu nee halo demanda ba sex buras ba bebeik. Dudu husi ransu livre, asesu informasaun interasaun iha facebook, etc. Liberal buras, merkadu buras, teknolojia-informasaun buras, sex mos buras. Produs ropa didiak barak, produs mos imajem erotik namnaba, hanesan insta-seleb sira. Han barak, foer hanesan plastik mos barak. Sex barak, foer hanesan bebe mos soe barak. Temi zero plastik maibe condom deit mos plastik, oin deit mos operasi plastik. Lucinta Luna husi Indonezia deit mos operasi transjender(kain sai belar) no operasi plastik. Hanesan Mugabe dehan, Brother! kapitalismu koloniza ita hotu ona apa. Nee tan motto liberal ida dehan it’s my body, hau nia desizaun, osan mak koalia.

Ho buat hirak nee hotu mak malae-minded ka liberal capitalist-minded sira nee  bebeik hodi satan ba problema iha Timor. No aat liu mak, asesor liberal, NGOs nia ajenda la hun la dikin ne’e, injeta ka sena tama hotu ba pratika governu nian, ativismu-nian no iha diskursu ba luta iha dezenvolvimentu nee nian. Liberal parte ba demokratizasaun halo NGO harii barbarak too sura labele iha Timor laran hodi haree ba problema oin-oin, husi labarik, feto, no klosan nia moris. Maibe ba klosan feto-mane mak dezempregu/kiak/rungu-ranga hela ba bebeik iha Timor.

Saida mak naksalak? Naksalak mak liberal biopolitika ne’e rasik neebe promove husi liberal malae-minded sira bainhira hahuu harii estadu nee? Dalabarak ita hanoin kala ita hakilar igualdade jeneru ona be ita ne’e ‘karuk’ – ativismu (fuan-boot), maibe la hatene katak ita tolan hela hanoin-pratika moralismu bourgeois husi liberal extremu ‘liraslos’ nian. Se estadu hili nakloke-an tomak ba ordem neoliberal kapitalismu, futuru feto-klosan ho mane-klosan laos ona iha estadu nia liman, maibe iha tirania merkadu nia liman – maromak mos sei hit liman-rua apa!

LEAVE A REPLY

Please enter your comment!
Please enter your name here