Home Analisa Soe Bebe: Estadu Nia Responsabilidade iha Ne’ebe?

Soe Bebe: Estadu Nia Responsabilidade iha Ne’ebe?

201
0
Bebe abandonadu (Foto: YouTube)

Kazu soe bebe akontece bebeik iha fulan hirak nia laran ona. Asuntu ne’e mosu bebeik iha publikliu, iha media sosial ka media mainstreaming nian. Publik kondena hahalok ne’e hanesan problema la iha mora (hosi komentáriu Rede Feto iha Tatoli 25/07/2019) deit. Komisariu Labarik husu responsabilidade mane nian mos, tanba dehan mane mos kontribui ba kazu soe bebe. Ema barak hatudu sira nia preokupasaun, maibe iha tendénsia bot atu fo todan ba ema nudar individu ka familia no uituan deit mak koalia kona ba responsabilidade estadu.

Iha moris ne’e la iha ema ida moris mesak, ema ida moris iha familia, iha komunidade, no iha sosiedade nia laran. Sira hotu tama iha kontratu sosial ida ho estadu, bainhira estadu ida hamrik, estadu ne’e iha respon sabilidade bo’ot atu proteze, hakonu, promove dereitus umanus. Bainhira ema ida soe nia oan, estadu labele nonook deit, ka la foti medida hodi prevene.

Fatores sira kontribui ba hahalok soe bebe ne’e belit ba inidividu (family), nudar filiadu bebe nian, komunidade, no estadu. Bele deskonfia katak fator idamak feto ka labarik feto no mane lahatene kona ba oinsá mak halo relasaun sexual ho seguru. Kultura ita nian taka dalan ba diskusaun sex ka hanorin kona ba relasaun sexual. Nune’e edukasaun kona ba sex ka relasaun sex ladun hetan fatin iha sosiedade. Nune’e labarik sira, ka ema ida-idak ba buka hatene, tuir sira nia preferénsia, iha liur, ka iha internet ka media sosial sira.

Fator darua,feto/labarik feto isin rua sedu no labarik mane/mane lakohi responsabiliza. Bainhira la iha koinesementu no skill iha relasaun sexual mak dala barak lori labarik feto/feto adultu, ba hetan isin ne’ebe sira hakarak (unwanted pregnancy). Situasaun ne’e sai aat liután, bainhira labarik feto/adultu feto ida hatene katak labarik mane/adultu mane ne’e lakohi responsabiliza. Maski labarik mane/adultu mane ida hakarak responsabiliza, ne’e mos karik atu responsabiliza deit biolojikamente, laos responsabiliza ekonomia ka atu hakiak no haree bebe ida to’o bot.

Fator datolumak moe sosial. Bainhira labarik feto ka adultu feto ida hetan isin rua ka iha bebe maibe la iha aman ka laen, ne’e konsidera nudar buat ladiak no halo moe familia. Bainhira presaun sosial (familia no hosi liur) ne’e aumenta no la iha sistema hodi suporta ba labarik feto/adultu feto, no mos ba labarik mane, entaun bele halo labarik feto/adultu ne’e iha hanoin negativu no halo aktu mak kontra norma sosial no mos legal nian.

Fator dahat,uza internet la saudavel. Numeru ema uza internet aumenta ba bebeik, ne’e akompaña ho nuneru ema iha telemovel matenek (smart phone) mos aumenta. Maski nune’e, estadu la iha sistema ida atu próteze rede internet ba ninia sidadaun sira. Nune’e, labarik sira, liliu, uza oportunidade ne’e hodi asesu ba buat oioin mak bele fo risku ba sira nia moris. Alumni Parlementu Foinsae halo ona formasaun sira liga ho internet saudavel maibe ne’e seidauk naton. Internet no media sosial ne’e loke buat hotu-hotu ba ema atu asesu nune’e labarik sira ne’e seidauk iha sistema kontrolu ba ninia-an mak forte sempre monu ba oputurnidade sira mak fo risku.

Fator dalima,preokupasaun ekonomia familia nian. Familia ne’ebe nia oan hetan isin rua ka nia oan mane fo isin rua iha hanoin barak bainhira sira nia oan hetan ona situasaun hanesan ne’e. Sira preokupa tanba sira sei la iha kbi’it atu sustenta membru ida tan ne’ebe sei moris mai. Bainhira preokupasaun ne’e sai bo’ot sempre lori filiadu sira ba hanoin negativu oioin, inklui halo abortu ka soe bebe.

Fatores hotu ne’ebe temi iha leten iha ligasaun forte ba ema ne’ebe hasoru situasaun sira hanesan ne’e no mos liga ho dezenvolvimentu sosial, polítika no ekonomia estadu nian. Iha aspeitu dezenvolvimentu sosial, bainhira ita koalia edukasaun, responsabilidade bo’ot liu mak iha estadu nia liman, nune’e mos bainhira ita koalia kona internet saudavel, relasaun sex seguru, ekonomia familia, no mos sistema kuidadu sosial.

Estadu iha ninia dever ba nia sidadaun to’o iha ne’ebe? Estadu iha dever ka lae bainhira nia sidadaun, inan/aman la onra sira nia komitmentu hodi haree sira nia oan? Estadu nia dever/responsabilidade to’o iha ne’ebe? Tuir Konstituisaun RDTL no mos Konvensaun Internasional ba Dereitu Labarik nian, estadu iha obrigasaun atu próteze no hakonu dereitu labarik nian. Iha kazu soe bebe, ne’e relasiona ho dereitu ba moris. Bainhira bebe ne’e nia inan ka aman ho idade kik ka minoria, estadu iha mos obrigasaun atu próteze no hakonu sira nia dereitu no kria kondisaun, liu hosi politika ka programa, atu labarik sira bele halao sira nia dever.

Kazu mak akontese iha Lahane, semana hirak liuba, bainhira bebe ne’ebe soe moris hela, estadu ninia apparatus tribunal halo desizaun sala bot ida, hodi entrega hikas labarik ba nia inan ka familia. Lei bele regula kona ba filiasaun bebe nian, maibe estadu loloos avalia komitmentu inan/aman nian hodi haree se sira bele delibera sira nia komitmentu nudar filiadu ka lae. Inan/aman ne’e lakohi ona, ka la iha komitmentu ona mak soe nia oan. Estadu loloos ne’e halo desizaun hodi haree bebe ne’e, liu hosi meius kuidadu sosial nian mak estadu iha.

To’o agora ita seidauk iha fatin seguru ba inan sira hodi husik hela ka rai sira nia bebe, bainhira sira siente katak sira la iha ona komitmentu ka la iha kbit hodi tau matan. Bainhira fatin seguru hanesan ne’e la iha mak posibilidade ba ema atu soe bebe sei aumenta ba bebeik. Dalan seluk, bainhira la iha fatin seguru, estadu bele haree ka apoio instituisaun sosial seluk, ne’ebe halo knar kuidadu sosial hodi tau matan ba ne’ebe inan/aman husik hela.

Estadu ninia responsabilidade laos deit ba bebe ka labarik maibe estadu mos iha responsabilidade ba inan/aman ka adultu sira. Estadu presija garante joven sira iha matenek, koinesmentu, no skill atu tranzisiona ho susesu hodi tama ba moris adultu nian. Tanba ne’e estadu iha obrigasaun atu kria no dezenvolve edukasaun ida ho qualidade, programa dezenvolvimentu juventude mak iha karakter muda mentalidade joven sira nian, no kria kondisaun ekonomia atu ninia sidadaun sira bele sustenta sira nia an no kontribui ba dezenvolvimentu nasional.

LEAVE A REPLY

Please enter your comment!
Please enter your name here