Home Notisia FONGTIL Halo Enkontru Ho MCC Atu Hatene Lala’ok Implementasaun Projetu Bee Moos,...

FONGTIL Halo Enkontru Ho MCC Atu Hatene Lala’ok Implementasaun Projetu Bee Moos, Saneamentu no Edukasaun

769
0
FONGTIL halo enkontru ho MCC. [Foto: Umbelina | 08.06.2023]

Reportajen Umbelina dos Reis

Forum Organizasaun Naun-Governamental Timor-Leste (FONGTIL) hamho Rede Ba Saúde Timor-Leste (REBAS-TL), enkontru ho United States Agency for International Development (USAID), hodi ko’alia konaba asuntu Saúde, Edukasaun no Infrastrutura bázika iha Timor-Leste, liu hosi projetu Millennium Challenge Corporation (MCC) ne’ebé governu Timor-Leste asina kontrata iha fulan Juñu tinan kotuk.

Diretor Ezekutivu FONGTIL Valentim da Costa Pinto hateten, ohin FONGTIL nia objetivu konvida ekipa hosi Millennium Challenge Corporation (MCC) mai FONGTIL, hodi ko’alia konaba oinsá fahe sira nia hanoin no esperiénsia liga ho projetu ne’ebé sei hala’o iha Timor-Leste.

“Fulan Juñu tinan kotuk liu ba governu Timor-Leste asina kontratu ho Estadus Unidus liu hosi Millennium Challenge Corporation (MCC) ho montante total $484 milaun, ne’ebé sei aloka ba setor Bee-mos no Edukasaun, entaun FONGTIL iha rede ne’ebe servisu ba edukasaun no infrastrutura bázika nian, hanesan bee-mos no saneamentu, nune’e bele partilla hamutuk oinsá sosiedade sivil fo espasu ba sira, hodi halo servisu hamutuk oinsá  halo mudansa ba ita nia nasaun tinan lima mai tuir kontratu ne’ebé asina,” dehan Diretor Ezekutivu FONGTIL Valentim  da Costa, iha salaun Kaikoli, Kuarta-feira, 07/06.

Nia dehan, nu’udar sosiedade sivil tenki hola parte tanba sira halo investimentu  iha ita nia rai, hodi bele ajuda servisu iha parte advokasia nian, nune’e oinsá bele fo hanoin nafatin ba governu Timor-Leste  hodi haree di-diak konaba efisiénsia no efikasia ba rekursu fundus nian hodi mellora di’ak liu tan ba setor Edukasaun no Bee-mos. Sira nia projetu ne’e sei foku uluk ba Munísipiu 4 ne’ebé besik kapital Dili, maibé sira nia investimentu boot mak halo purifikasaun bee-foer iha valeta laran, ne’e sistema foun iha ita nia rain entaun presija tau atensaun ba sistema ne’e hodi fo benefísiu ba populasaun.

Fatin hanesan Resident Country Director Timor-Leste Gretchen “Gigi” Goodhart hateten, oportunidade di’ak tanba USAID servisu hamutuk ho governu Timor-Leste realiza projetu rua ne’ebé sei implementa hosi governu Timor-Leste rasik, projetu ne’e hanaran kompaktu Millennium Challenge Corporation (MCC), no projetu ne’e dezenvolve rasik hosi governu Timor-Leste iha área rua, projetu primeiru Bee saneamentu ho drainajem, projetu segundu edukasaun fokus ba nivél ensinu sekundáriu, teknika vokasionál, fo formasaun ba profesores, no líderansa ba eskola sira.

“Projetu Millennium Challenge Corporation (MCC), entre governu Timor-Leste estabelese mós entidade ida hanaran Millennium, sei servisu hamutuk ho instituisaun governu nian hodi bele implementa projetu refere. Projetu primeiru Bee saneamentu dreinajem sei implementa hosi Bee Timor-Leste, projetu segundu edukasaun sei implementa hosi Ministériu Edukasaun,” nia dehan.

Nia konklui, Governu Amérika liu hosi Millennium Challenge Corporation (MCC),  kontribui orsamentu  U$420 milões dolares Amerikanu, inklui governu Timor-Leste kontribui mós orsamentu 64 milões dolares Amerikanu hodi implementa projetu refere.

Print Friendly, PDF & Email

LEAVE A REPLY

Please enter your comment!
Please enter your name here