Reportajen David da Costa
Prezidente Republika (PR), Dr. José Manuel Ramos-Horta, ohin kondekora Embaixadór Reinu Tailándia nian iha Timor-Leste, Ekapol Poolpipat ho Grau Medailla Ordem Timor-Leste, fo rekoñesementu ba servisu ne’ebé diplomata ne’e hala’o iha âmbitu promove amizade entre povu nasaun rua ne’e.
No Grau Ordem de Timor – Leste kria hosi Dekretu – Lei nú . 20/2009 , 06 de Maio. Kondekorasaun ba Embaixadór Reinu Tailândia Ekapol Poolpipat nu’udár rekoñesimentu ba servisu ne’ebé diplomata ne’e hala’o iha âmbitu promove amizade entre povu nasaun rua ne’ebé kontribui mós ba kria pás, estabilidade nasionál Dezenvolvimentu iha Timor – Leste.
Nune’e Prezidente Repúblika , tuir artigu 85 , alinea j) Konstituisaun Repüblika Demokrátika Timor – Leste , konjuga ho artigu 2 alinea a) hosi artigu 5 , Dekretu – Lei nu . 20/2009 , 06 de maio dekreta atu fó Ordem de Timor – Leste Grau Medalla ba Embaixadór Reinu Tailándia Ekapol Poolpipat.
Embaixador Tailándia iha Timor-Leste, Ekapol Poolpipat, hateten, ohin simu kondekorasaun medalla ne’e, hanesan onra bo’ot ida, tanba Medalla ne’e hanesan onra la’ós de’it ba Embaixada maibé ba mós kolega sira, ba nasaun taliándia nomós ba kolega Timor oan ne’ebé maka kopera ho Embaixada Tailándia Iha tinan tolu liu ba.
Iha Tinan tolu liu ba maske hasoru dezafiu hanesan Covid-19 no lokdow, mudansa klimátika, impase polítika no ekonomia down hotu maibé Tailándia no Timor Leste kontinua programa no hala’o diálogu durante tinan tolu liu ba. Tailándia oferese projetu dezenvolvimentu lubuk ida ba Timor Leste hanesan implementa projetu iha eskola neen (6), inklui kombate mal nutrisaun, sanitasaun no programa sira hadi’ak estandar, hadi’ak moris labarik no estudante sira nian iha Ermera, Baucau no iha munisípiu sira seluk.
Iha tinan kotuk selebra 20 aniversáriu koperasaun bilateral entre Tailándia no Timor Leste iha ne’ebé emabiaxada Tailándia organiza atividade komemorativu lubuk ida inklui reflorestasaun ai-parapa iha Hera Metinaro no embaixador mós organiza semináriu kona-ba Profil Timor Leste iha Tailándia.
“Ha’u fiar katak, iha tinan tuir mai Tailándia sei iha relasaun bilaterál ho Timor Leste ida ne’ebé metin liu tan, tanba Timor Leste sei hola parte nu’udar membru ofisiál ASEAN. Antes to’o iha ne’ebá Tailándia sei oferese programa kapasitasaun rekursu umanu ba Timor Leste hodi prepara an prontu sai nu’udar membru ASEAN,” dehan Embaixador Tailándia iha Timor-Leste, bainhira Remata Simu medailla husi PR Ramos-Horta, iha Palásiu Prezidensial Bairo-Pite, Kuarta 7/06.
Nia hatutan, Iha tinan tolu liu ba maske hasoru dezafiu oi-oin, nu’udar embaixadór Tailándia iha Timor Leste inisia programa online traning ba organizasaun koperativa sira no mós kursu téknika lubuk ida. Nune’e mós, iha tinan kotuk Tailándia oferese bolsu estudu ho grau Maestradu ba Funsionáriu Timor oan na’in 20, programa bolsu estudu ne’e atu signifika relasaun bilaterál Tailándia no Timor Leste, maibé Tailándia mós sei kontinua fó formasaun no bolsu estudu ba Timor oan sira atu asegura rekursu umanu Timor Leste prontu atu hala’o serbisu bainhira sai membru ASEAN.
“Iha tinan kotuk liurai Tailándia manda nota kongratulasaun ba Prezidente Repúblika José Ramos-Horta no reafirma komitmentu Tailándia nian atu hametin kooperasaun bilaterál ho Timor Leste,” hakotu nia.
