Reportajen David da Costa
Deskonfia Sekretáriu Estadu Komunikasaun Sosial (SEKoms) halo intervensaun iha sala redasaun Radio Televizaun Timor-Leste, Empreza publiku (RTTL.ep), Konsellu Imprensa Konsidera Intervensaun ida ne’e kontra lei, tanba ne’e konsellu Imprensa husu ba RTTL atu bele hato’o keixa ba intervensaun husi SEKoms ne’e.
Konselleiru Konsellu Imprensa (KI), Francisco Belo Simoes da Costa, hateten, kazu Sekretáriu Estadu Komunikasaun Sosial (SEkoms) ne’ebé maka halo intervensaun iha sala redasaun editorial Radio Televizaun Timor-Leste, Empreza publiku (RTTL.ep), ne’e, hanoin iha Konstituisaun artigu 41, iha numeru 4 difini klaru ona katak garante atu labele iha intervensaun poder politika ou poder ekonomiku sira iha independensia editorial. No iha mos lei Komunikasaun Sosial iha artigu 8, 10 ho 42 mos garante kona-ba ida ne’e, labele iha intervensaun ba iha independensia editorial.
“Hau hanoin hanesa memburu konsellu Imprensa, hanesna mos jornalista ida, reprezentante jornalista iha KI, ita la admite iha violasaun ba lei sira ne’ebé estadu ne’e hatur ona. Buat ne’ebé ita presiza maka atu tau matan ba liberdade imprensa no liberdade espresaun, liuliu labele iha intervensaun politiku poder no poder ekonomia iha independensia editorial,” Dehan Konselleiru Konsellu Imprensa Francisco Belo Simoes da Costa, iha salaun KI Kintal boot, Sexta 3/05.
Nune’e husu ba entidade hotu-hotu atu hala’o ninia knaar, tuir ida-idak nian no fó liberdade ba media ida-idak nian, tantu media privadu no media estatal atu ida-idak halo nia funsaun independentemente labele iha intervensaun poder politika no poder ekonomia.
“Hau hanoin ida ne’e ita la admite, atu intervensaun ne’e akontese. Konsellu Imprensa nakloke ba redasaun RTTL.ep, xefe redasaun sira, bele hato’o keixa mai iha konsellu Imprensa kona-ba intervensaun sira hanesan ne’e. Tamba intervensaun sira ne’e viola lei, kolega jornalista sira no redasaun sente opende husi intervensaun sira ne’e bele hato’o keixa ba iha tribunal. Atu nune’e bele fó lisaun katak iha lei hateten ida ne’e,” Nia esplika.
Iha fatin hanesan, Presidente Konsellu Imprensa (KI) Otelio Ote, hateten, Kompetensia Konsellu Imprensa kalaru ona iha ne’ebá, tenke asegura katak iha liberdade asesu informasaun ba sidadaun hotu, asegura katak iha liberdade opiniaun, Liberdade Imprensa, no ida ikus maka tenke asegura independensia editorial.
“Ita lakoi tolera ka simu, em se deit maka halo intervensaun ba Independensia editorial, komesa husi prosesu inisiu, hahú husi planu kobertura, enkontru iha sala redasaun, iha prosesu produsaun, no to’o iha final produsaun labele iha intervensaun husi autoridade se deit,” nia dehan.
Nia haktuir, Karik iha orentasaun bele fo orientasaun maibé orentasaun ne’e labele iha valor aas liuba redasaun atu trava produsaun produtu jornalistiku sira nian. Iha mundu ne’ebé deit, sempre iha intervensaun husi autoridade se ne’ebé, maibé haree ba iha intervensaun sira, se kaundu nia mai halo intervensaun labele publika informasaun ida-ne’e no fo prioridade ba iha notisia ida ne’e, ida ne maka intervensaun iha editorial.
“Maibé hau mos hakarak alerta mos, bainhira ita koalia kona-ba intervensaun, ita tenke separa entre intervensaun ida ne’ebé dudu ita atu iha kualidade jornalizmu ho intervensaun ida ne’e hakrak fahe ba ita iha prosesu produsaun nian, ita boot sira mos tenke atensaun ba ida-ne’e. Tanba iha mundu ne’ebé deit, intervensaun sempre iha, husi media nain, autoridade se deit sempre iha,” nia esplika.
“Maibé haree ba iha formatu intervensaun, iha formatu intervensaun maka dehan imi labele atrasa mai enkontru, imi labele atrasa publika informasaun, ida ne’e intervensaun ida diak, no intervensaun ita boot sira labele publika informasaun ida ne’e, ita boot sira tenke fó prioridade ba notisia ida-ne’e, ida ne’e intervensaun ba editorial,” nia afirma.
Maibé, agora oinsa maka atu prevene ba ida-ne’e, fila fali ba iha konsellu redasaun ida-ne’e nia, se ema mai halo intervensaun maka apoiu loos deit, entaun kazu ne’e bele kontinua aumenta ba beibeik maibe konsellu redasaun mak rezeita intervensaun maka sei diminui kazu sira hanesan ne’e.
“Ita tenke simu sira nian intervensaun, maibe ita tenke esplika ba sira, atu nune’e intervensaun labele la’o hela deit, depois ita ko’alia hela deit ba iha publiku mas ita nia dezisaun iha sala redasaun laiha, ita husik dalan para intervensaun ne’e sei kontinua barak. Ne’ebé koko atu depende ita nian sala redasaun tanba kualidade jornalizmu ne’e laos mai husi fatin seluk mai husi sala redasaun,” tenik nia.