Reportajen Joselina dos Santos
Komemorasaun Loron Liberdade Imprensa Konsellu Imprensa Konselho (KI) Timor-Leste, husu ba publiku no ukun-na’in sira atu respeita profisaun jornalizmu no média iha Timor-Leste ne’ebe asume pápel importante nu’udar pilar importante ida ba Demokrasia no dignu. Husu mos responsavel orgaun no meius komunikasaun sosiál atu kria kondisaun servisu ne’ebé adekuada ba jornalista sira hodi ezerse sira nia servisu nomos asegura servisu redasaun ne ebé independente sem intervensaun poder politiku no poder ekonomiku.
Liuhosi Konferensia Imprensa, Prezidente CI Otelio Ote hatete, Loron importante ne’e nu’udar instrumentu ba prinsipiu basiku liberdade imprensa liga ho pluralismu no independensia média. Komemorasaun ne’e hanesan mos resposta importansia hodi asegura liberdade imprensa iha mundu inklui iha Timor-Leste. Iha tinan ida ne’e Conselho Imprensa foti pasu konkretu hodi hatan ba Tema mundial Loron Liberdade Imprensa maka “Jornalismu Hasoru Krize Ambiental” ne’ebe sei sai foku diskusaun prinsipal iha Konferensia Internasional Forum Dialogu de Dili ba dala 6 ne’ebé sei halao iha 10 de maiu.
“Timor-Leste aktualmente liberdade imprensa no liberdade espresaun lao diak haforsa ho relatoriiu ne’ebé publika hosi Reportagen sem Fronteira (RSF). Iha tinan 2023 rekoñese Timor-Leste tama iha kategoria Liberdade diak okupa númeru 10 hosi nasaun 180 sira seluk. Maske nune Timor-Leste labele urgullu deit ho numeru ne’e maibe presija hadia parte fraku hirak ne’ebé existe hela. Tanba ne’e jornalista, média, Asosiasaun Jornalista, Conselho Imprensa no estadu Timor-Leste nia responsabilidade atu hadia parte fraku hirak ne’e”, dehan, Prezidente Otelio Ote iha Salaun CI Kintal boot,03/05.
Dadaun ne’e jornalista ne’ebé rejistadu no hetan ona karteira profesionál husi Conselho Imprensa hahu iha tinan 2017 to’o 2023 hamutuk ema na’in 405, ne’ebé ativu 322 kompostu hosi jornalista mane 209 no feto 133. Enkuantu numeru ne’ebé pendente hamutuk ema 83. Husi sorin seluk mídia ne’ebé rejistu ona iha Conselho Imprensa hamutuk 48. Conselho de Imprensa Timor-Lete estabelese bazeia ba Lei Komunikasaun Sosiál, Nú:5/2014 liu hosi Dekretu-Lel Nú:25/2015 bolu atensaun ba publiku, ukun nain sira, jornalista inklui responsavel orgaun no meius komunikasaun sosial atu hamutuk asegura nafatin liberdade imprensa no liberdade espresaun iha Timor-Leste ne’ebé konsagra ona iha konstituisaun RDTL rtigu 40 no 41.
Apela ba jornalista no equipa servisu redaksaun mídia atu kontinua mantein profisionalismu, hakruk ba kódigu étika jornalista hodi dignifika profisaun jornalismu. Enkoraja maluk jornalista no media matein independensia no impartsialidade atu públiku labele lakon sira nia direitu atu asesu ba informasaun ne’ebé iha kualidade nu’dar direitu fundamental ne’ebé konsagra ona iha konstituisaun RDTL. Husu mos ba Secoms no Sefope atu kria politika hodi konsidera salariu mínimu ne’ebé dignu ba jornalista sira, Ikus ami apela ba publiku no responsavel instituisaun estadu wainhira iha kazu ne’ebé liga ho produtu jornalistika bele opta alternativa atu rezolve ho dalan mediasaun tuir lei komunikasaun sosial antes lori ba tribunal nu’udar meiu atu haburas liberdade imprensa.
